Обидот за преземање од „Уникредит“ е непријателски, велат од „Комерцбанк“

„Комерцбанк“ (Commerzbank AG) ја засили реториката против пристапот на „Уникредит“ (UniCredit SpA), дополнително комплицирајќи ја ситуацијата за италијанската банка.

Стратегијата на „Уникредит“ за купување и проширување на уделот во банката, додека размислува за понуда за преземање, е „непријателска“, посочи портпаролка на „Комерцбанк“ во писмено соопштение во средата. Ова е првпат „Комерцбанк“ да го употреби тој термин во однос на пристапот на „Уникредит“.

Овие коментари ги зголемуваат тензиите што се присутни од септември, кога „Уникредит“ првпат објави дека поседува удел во „Комерцбанк“. Иако раководството на „Комерцбанк“, вклучувајќи ја и извршната директорка Бетина Орлоп, досега покажуваше скептицизам за придобивките од договор со „Уникредит“, тие не изразија директна опозиција.

Во изјавата од средата, „Комерцбанк“ истакнува дека сè уште е отворенa за „ангажирање во разговори“ со „Уникредит“ откако италијанската банка ќе изнесе понуда. „Сепак, досега не сме добиле никакoв предлог“, се наведува во соопштението.

Извршниот директор на „Уникредит“, Андреа Орсел, постепено го зголеми уделот на банката во „Комерцбанк“ во изминатите месеци. Тој главно се потпираше на деривати за да стекне контрола врз околу 28 отсто од германската банка, што предизвика гнев кај германската влада – и кај „Комерцбанк“.

Во интервју за телевизијата „Блумберг“ во вторникот, Орсел изјави дека не очекувал таква реакција на неговиот пристап кон „Комерцбанк“. Тој посочи дека имало повеќе состаноци со германската влада и раководството на „Комерцбанк“ пред купувањето на уделот, на кои од „Уникредит“ го изразиле својот интерес за германската банка.

„Тешко ми е да разберам“ зошто Берлин и „Комерцбанк“ изјавиле дека се изненадени од потегот, рече Орсел.

„Јасно бевме поканети“ од Берлин да учествуваме во продажбата на акциите од страна на владата во септември, рече тој.

„Се согласивме на соопштенија за медиумите за време на тој процес, повторно се консултиравме со раководството на ’Комерцбанк’, предупредувајќи го дека ќе учествуваме“, додаде Орсел. „’Комерцбанк’ беше првиот повик што го направивме утрото за да ги информираме за нашата позиција“.

„Комерцбанк“ во средата изјави дека „немало разговори меѓу ’Уникредит’ и раководството на ’Комерцбанк’ за потенцијална комбинација во последните две години пред инвестицијата на ’Уникредит’“.

Во интервју за германскиот весник „Франкфуртер алгемајне цајтунг“ (FAZ), објавено во средата, Орсел изјави дека „Уникредит“ претходно имал удел во „Комерцбанк“, но го продал кога не видел можност за понатамошно градење позиција. На прашањето дали тоа се случило во 2022 година, Орсел одговори „можеби“.

Тој додаде дека „Уникредит“ одржал повеќе од 10 состаноци со „институции во Германија“, како и со „врвното раководство на ’Комерцбанк’“ во изминатите две-три години.

Во моментов нема коментари за веста. Биди прв да коментира...

Остави коментар