Трамп сака да купи „тесла“ за да му помогне на Маск по големиот пад на акциите

Американскиот претседател Доналд Трамп изјави дека ќе купи сосема новa „тесла“ за да го поддржи Илон Маск, откако акциите на производителот на електрични автомобили имаа најлош ден во последните четири години поради растечкиот отпор кон политичките сојузи на Маск.

Во објава веднаш по полноќ во Вашингтон, Трамп наведе дека ќе купи новa „тесла“ „уште утре наутро“ како покажување доверба и поддршка за Илон Маск, кого го нарече вистински голем Американец. „Зошто да биде казнет за тоа што ги користи своите огромни вештини за да помогне да ја направи Америка повторно голема???“, запраша Трамп, кој не прецизира кој модел на „тесла“ ќе го купи.

Маск, кој потроши десетици милиони долари за да му помогне на Трамп да биде избран и сега е лицето на напорите на претседателот за намалување на трошоците на американската влада, одговори со едноставно „Благодарам“.

Акциите на „Тесла“ паднаа за 15 отсто во понеделникот откако аналитичарите, вклучувајќи го и Џозеф Спак од УБС (UBS Group AG), ги намалија проекциите за испорака. Според индексот на милијардери на „Блумберг“, нето-вредноста на Маск падна за повеќе од 130 милијарди долари од јануари.

Покрај нарушувањата поврзани со промена на дизајнот, отпорот кон Маск, кој е извршен директор на „Тесла“, ја нарушува позицијата на производителот на автомобили во некои од најголемите пазари за електрични возила во светот. Во Германија, на пример, регистрациите паднаа за 70 отсто во првите два месеца од годината, бидејќи Маск ја поддржа крајно десничарската Алтернатива за Германија во месеците пред изборите на 23 февруари.

Во Кина - најголемиот пазар за електрични возила во светот - „Тесла“ е меѓу производителите што се борат да одржат чекор со домашниот шампион БЈД (BYD Co). Испораките на возила од фабриката на компанијата предводена од Маск во Шангај паднаа за 49 отсто во февруари, на само 30.688 возила, што е најниска месечна бројка од јули 2022 година.

Падот на акциите на „Тесла“ во понеделникот беше најголемиот еднодневен пад од септември 2020 година. Акциите годинава се намалени за 45 отсто и ги загубија сите добивки од победата на Трамп на претседателските избори во САД во ноември.

Маск во понеделникот беше запрашан како ги води другите свои бизниси додека се фокусира на своите владини задолженија, во интервју со поранешниот советник на Трамп, Лери Кудлоу, на „Фокс“ (Fox Business). Најбогатиот човек на светот одговори: „Со голема тешкотија“.

Во моментов нема коментари за веста. Биди прв да коментира...

Остави коментар