Трамп ѝ се наврте на чистата енергија, ги чешла заемите дадени за таа намена

Администрацијата на Трамп ги истражува правните опции за откажување на заемите дадени во рамките на програмата вредна 400 милијарди долари за финансирање на технологијата за чиста енергија и размислува да ја ревидира иницијативата, информира анонимен извор.

Новоименуваниот директор на програмата за заеми на Министерството за енергетика, Џон Снид, на минатонеделниот состанок им рекол на претставниците на агенцијата дека напорите ќе бидат пренасочени кон фокусирање на технологиите што ги фаворизира новата администрација, како што се нуклеарната енергија и течниот природен гас, посочува анонимниот извор.

Снид исто така рече дека ја разгледува можноста за откажување на постојните финансиски договори, иако останува да се види дали тоа ќе биде правно остварливо и затоа не е донесена одлука.

Во писмен одговор Министерството за енергетика соопшти дека заемите се разгледуваат како дел од ревизијата на целата агенција „за да се осигури дека сите активности се во согласност со извршните наредби и приоритети на претседателот Трамп“.

Иницијативата настана во времето на претседателот Џорџ В. Буш, а таканаречената Канцеларија за кредитни програми обезбедува гаранции и директно финансирање за иновативни енергетски проекти што ги намалуваат емисиите на стакленички гасови.

До денес се финализирани повеќе од 60 милијарди долари финансирања за компаниите, вклучувајќи рекордни 15 милијарди долари за проекти за чиста енергија, 9,2 милијарди долари за „Форд“ (Ford) за фабрики за батерии и една милијарда долари за рудник за литиум во Невада. Преку програмата исто така е обезбеден заем од 465 милиони долари за „Тесла“ (Tesla) на Илон Маск како помош во производството на неговиот „модел ес“ (Model S).

Одобрен е заем од 465 милиони долари за „Тесла“, за да почне со производството на „модел ес“ (Model S) | „Блумберг“ (Bloomberg)

Што е под лупа?

Не е јасно кои заеми администрацијата на Трамп би можела да се обиде да ги врати, иако под лупа се 6,6 милијарди долари што ги доби компанијата „Ривијан аутомотив“ (Rivian Automotive), како и заемот од 7,54 милијарди долари за заедничко вложување на „Самсунг“ (Samsung SDI) и „Стелантис“ (Stellantis).

Програмата ѝ донесе на владата повеќе од пет милијарди долари во камати, но и покрај тоа таа е можеби најпозната по еден од ретките неуспеси - гаранција за заем во вредност од 535 милиони долари за време на администрацијата на Обама за компанијата „Солиндра“ (Solyndra), производител на соларна енергија што подоцна банкротира.

Враќањето на средствата или откажувањето на договорите за финансирање може да биде предизвик, особено ако парите веќе се потрошени, смета Питер Дејвидсон, извршен директор на канцеларијата во периодот од 2013 до 2015 година.

Поврат на средствата или раскинување на договорите ќе биде тешко, особено ако парите се веќе потрошени | Depositphotos

„Ако парите се дисперзирани и потрошени, не знам како можете да ги вратите назад“, рече Кевин Бук, директор во „Клиарвју енерџи партнерс“ (ClearView Energy Partners). „Тоа изгледа многу тешко. Но сè уште е можно“, напиша Џим Лусиер, директор во „Капитал алфа партнерс“ (Capital Alpha Partners), во својата истражувачка белешка минатиот месец.

„Парите што се исплатени веројатно се со најнизок ризик, но, според нашето мислење, сè уште се потенцијално предмет на поврат на средства. Парите што се резервирани, но не се исплатени, веројатно ќе се чуваат 90 дена или подолго“, се наведува во белешката.

Програмата има речиси 47 милијарди долари условени обврски кон компаниите што допрва треба да се финализираат.