Што значи заострувањето на трговските односи меѓу ЕУ и САД за еврото?

Оправдувањето на Доналд Трамп да ја вовлече 27-члената ЕУ во „најглупавата трговска војна“ без победник е огромниот трговски дефицит на САД со блокот. Вчера, кога ги објави (а подоцна ги повлече) тарифите за канадскиот и мексиканскиот увоз, претседателот упати уште едно предупредување кон Европа, велејќи дека царините „дефинитивно ќе се случат наскоро“.

„Тие не земаат речиси ништо, а ние земаме сè, милиони автомобили, огромни количини храна и земјоделски производи“, им повтори Трамп на новинарите во овалната соба на Белата куќа, привлекувајќи внимание на трговскиот дефицит, кој го опиша како „ ѕверство“.

Неговите најави ги потресоа и валутните пазари, кои сега се обложуваат на поголема нестабилност на еврото и очекуваат Европската унија да биде следната цел на царините на Трамп. Европската заедничка валута ја доживува својата најпроменлива година од 2022 година, кога вредноста на еврото се изедначи со вредноста на американскиот долар. Побарувачката сега расте за опции кои би се исплатиле ако неодамнешниот опсег на тргување дополнително се прошири, објави денес „Блумберг“.

Инвеститорите бараат да се заштитат од суровите потези на потенцијалната трговска војна што би можела да дојде од двете страни на Атлантикот. Со оглед на тоа што еврото веќе е во својата најдолга низа загуби во однос на доларот во последните три години по тарифните планови на Трамп, постои ризик да се лизне дополнително кон паритет со доларот - или да се опорави ако на некој начин се избегнат царините за Европската унија.

„Пазарот се обидува да предвиди и тргува во многу непредвидлива ситуација“, изјави за „Блумберг“ Антони Фостер, шеф на спот тргување со валути Г-10 во „Номура интернешнл“ (Nomura International).

ЕЦБ во поплава од лоши вести

На лошата перспектива на еврото влијае и веќе ослабената економија во еврозоната, која е повлечена во црвено пред се од политичките и економските кризи во двете најголеми економии во регионот, Германија и Франција.

Европската централна банка (ЕЦБ) повторно ги намали каматните стапки за 25 базични поени минатата недела, потклекнувајќи под притисокот на пазарите и креаторите на политиката да усвојат поагресивен пристап за намалување на каматните стапки, како и политичките превирања во регионот кои негативно влијаат на бавната економија на блокот.

Сепак, вчера имаше лоши вести за банката со седиште во Франкфурт, бидејќи европската статистичка служба Евростат објави податоци за годишната стапка на инфлација во еврозоната. Таа се зголеми на 2,5 отсто на годишно ниво во јануари, над целта на ЕЦБ од 2 отсто.

„Ако инфлацијата не се придвижи кон посакуваното ниво од два отсто, ЕЦБ би можела да го запре натамошното намалување на каматните стапки, што би го поддржало зајакнувањето на еврото во однос на американскиот долар“, рече аналитичарот на „Блумберг Адрија“, Михаел Блажековиќ на почетокот на јануари.

Различни мислења на аналитичарите

Аналитичарите се поделени околу иднината на еврото. Фостер од Номура, на пример, верува дека ќе биде потребна повторна ескалација на трговската војна за еврото да достигне паритет со доларот. Други, како што е „Вестпек бенкинг корпорејшн“ (Westpac Banking Corporation), веруваат дека доларот ќе продолжи да наоѓа купувачи. Дивергенцијата на монетарната политика - Европа ги намалува каматните стапки побрзо од САД - исто така влијае на еврото, велат тие.

Еврото во моментов е на седми ден загуба, со пад од 0,2 отсто во денешното тргување. Според Јоргос Саравелос, шеф на валутно истражување во „Дојче банк“, тоа би можело да достигне паритет во однос на американскиот долар доколку се земе предвид највисоката премија за ризик од трговска војна, пишува „Блумберг“.