Трговците се обложуваат на „ролеркостер“ за еврото

Трговците се обложуваат на поголеми промени на вредноста на еврото, додека девизниот пазар веќе со сигурност очекува дека следниот фокус на тарифите на американскиот претседател Доналд Трамп ќе биде на Европа.  Заедничката валута веќе доживеа најголема нестабилност од 2022 година во изминатата недела, бидејќи заканите на САД и наметнувањето на некои трговски тарифи се претворија во одмазди и одложувања. Сега расте побарувачката за опции што се исплаќаат ако неодамнешниот опсег на тргување дополнително се прошири.

Инвеститорите се штитат од евентуален остар потег што може да дојде во која било насока. Со оглед на тоа што еврото веќе е во својата најдолга низа загуби во однос на доларот во последните три години по тарифните планови на Трамп, постои ризик да се лизне дополнително до паритет - или да се врати ако се избегнат царините за Европската унија.

„Пазарот се обидува да предвиди и тргува со многу непредвидлива ситуација“, рече Антони Фостер, шеф на Г-10 валутно тргување во „Номура интернешнл“ (Nomura International Plc).

Блумберг

На пазарот на опции, таканаречените 10 делта-пеперутки, кои ги одразуваат очекувањата за големи потези во следниот месец, го достигнаа своето највисоко ниво од август, кога распуштањето на глобалните „кери трејдс“ (carry trades) ги потресе пазарите. Обемот на опции, исто така, се зголеми со почетокот на неделата, според податоците од „Депозитори траст енд клиринг корпорешјн“ (Depository Trust & Clearing Corporation).

Побарувачката скромно фаворизира изложеност на добивки во еврото, што сугерира дека некои трговци се обложуваат на враќање ако тарифите се одложат или не се имплементираат. Поскапо е да се обложувате на понатамошни падови.

Ставовите меѓу аналитичарите исто така се широко спротивставени. Фостер од „Номура“ смета дека ќе биде потребна ескалација во трговската војна за еврото да го погоди паритетот.

Други, како што е „Вестпек бенкинг корп“ (Westpac Banking Corp.), мислат дека зелената банкнота ќе продолжи да наоѓа купувачи. Разликата во монетарната политика - со тоа што Европа ги намалува каматните стапки побрзо од САД - исто така влијае на еврото.

Заедничката валута е на седмиот ден на загуба, тргувајќи се со пад од 0,2 проценти на околу 1,033 долари до 10:40 часот денеска во Лондон. Тоа би можело да достигне паритет наспроти зелената банкнота ако максималната премија за ризик од трговска војна - како што беше видена за време на првата администрација на Трамп - се вметна во цената, според Џорџ Саравелос, шеф на валутно истражување во „Дојче банк“ (Deutsche Bank AG).