Вреди ли да се инвестира во руската рубља?

Во услови без воени конфликти и санкции, руската рубља би можела да се смета за атрактивна валута за инвестирање. Тековниот девизен курс сугерира потенцијал за значителни приноси, под услов на стабилизација на геополитичките односи и намалување на економската неизвесност. Доколку девизниот курс се врати на нивото од околу 80 рубли за евро (нормалното ниво од последните 5 години), инвеститорите би можеле да остварат профит од дури 25 проценти само од тргувањето со валути. Макроекономските показатели, и покрај предизвиците, укажуваат на основите кои го поддржуваат зајакнувањето на рубљата. Кога ќе ја погледнеме состојбата на руската економија, би можело да се рече дека цветаат рози. Економијата во третиот квартал порасна за 3,1 проценти, додека во претходните квартали овој раст беше уште поизразен. Растот е поттикнат од потрошувачката на населението и воената економија. Невработеноста е на историски најниско ниво поради мобилизацијата, но и силната побарувачка во економијата, додека стапката на вработеност е исто така на највисоко ниво, близу 70 проценти. Единствениот проблем што се наѕира е високата инфлација од 8,5 проценти, која централната банка не може да ја намали со постојаното зголемување на каматните стапки. Меѓутоа, инфлацијата всушност е последица на воената економија и силната домашна побарувачка.

Воената економија и зголемената домашна побарувачка ги одржуваат индексите на доверба на менаџерите за набавки во зоната на експанзија (над 50). Обемот на кредити на домаќинствата и компаниите расте и покрај високите каматни стапки кои достигнуваат неверојатни 20 проценти. Од друга страна, цената на нафтата не ја фаворизира валутата. Цената на нафтата на светскиот пазар останува под притисок поради слабата побарувачка, особено од Кина. Цената на руската нафта е дополнително намалена поради билатералните трговски договори со Кина и Индија и санкциите. ОПЕК се обидува да ги стабилизира цените на нафтата со ограничување на производството, но условите на глобалниот пазар спречуваат поголем раст на цените.

Со цел да се запре натамошниот пад на рубљата, централната банка на Русија неодамна ја зголеми референтната каматна стапка на 21 отсто. Сепак, ниту тоа не го спречи натамошниот пад кон нивоата од почетокот на 2022 година. Централната банка нагло го прекина купувањето на сите странски валути до крајот на годината, додека енергично го продава кинескиот јуан, а се со цел да се обиде да ја усогласи домашната валута. Може да се каже дека и успеа во тоа бидејќи од 120 рубљи за евро по тие одлуки рубљата зајакна на 105. Во 2025 година очекувам руската рубља да зајакне и да оди кон 100 за едно евро. Според очекувањата, централната банка треба да ја зголеми референтната каматна стапка за да се обиде да ја запре инфлацијата и да се движи кон целта на централната банка од четири проценти. Прашање е дали уште повисока камата ќе ја задуши економијата која всушност троши како да нема утре.

Јакнењето на рубљата позитивно би се одразило на компаниите од регионот Адрија кои работат на рускиот пазар, особено на фармацевтскиот сектор кој не е под директни санкции. Стабилизирањето на валутата би можело да го намали притисокот врз маржите и да ги подобри оперативните резултати на овие компании. Движењето на курсот евро/рубља е особено важно, бидејќи е речиси невозможно да се осигура ризикот од промена на руската валута, со оглед на бројните санкции во банкарскиот сектор.

Во моментов нема коментари за веста. Биди прв да коментира...

Остави коментар