Една година откако инвазијата врз Украина доведе до голем број санкции од Западот против Москва, кинескиот јуан го замени американскиот долар како најтргувана валута во Русија.
Јуанот во февруари првпат го надмина доларот во месечен обем на тргување, а разликата стана поизразена во март, покажуваат податоците собрани од „Блумберг“ врз основа на дневните трансакции од Московската берза. Пред инвазијата обемот на тргување на јуанот на рускиот пазар беше занемарлив.
Bloomberg Mercury
Промената доаѓа откако дополнителните санкции оваа година погодија неколку банки во Русија, кои ја задржаа можноста да вршат прекугранични трансфери во долари и други валути на земји што Кремљ ги означи како непријателски. Банката „Рајфајзен“ (Raiffeisen Bank International AG), чија руска филијала останува еден од главните канали за меѓународни плаќања во земјата, беше меѓу кредиторите што беа под зголемен притисок од европските и американските власти.
Русија ги продлабочи своите врски со Кина по воениот конфликт, кој започна кон крајот на февруари 2022 година, што резултираше со прекин на односите со Западот. Во март годинава кинескиот претседател Си Џинпинг ја посети Москва, што беше прва средба во странство по неговиот реизбор, и му вети на Кремљ дека ќе ја прошири соработката во областа на трговијата, инвестициите, синџирите за снабдување, мегапроектите, енергијата и високата технологија.
Bloomberg Mercury
Сеопфатните санкции насочени кон рускиот финансиски систем ги принудија Кремљ и руските компании да ги префрлат своите надворешнотрговски трансакции од долар и евро во валути на земјите што одбија да се приклучат на какви било ограничувања. Министерството за финансии претходно оваа година ги претвори своите пазарни операции во јуани наместо во долари и разви нова структура за националниот фонд да држи 60 проценти од своите резерви во јуани.
Банката на Русија редовно ги повикува компаниите и граѓаните да ги префрлат своите средства во руска рубља или во валути на пријателски држави за да се избегне ризикот од нивно блокирање или замрзнување. И покрај сето тоа, американскиот долар остана најпопуларна валута на рускиот пазар досега и само ретко беше во загуба во однос на обемот на тргување со јуанот, покажуваат податоците за валутна размена на „Блумберг“.
„Сега има помалку долари на пазарот бидејќи приходите на Русија се намалија поради падот на цената на нафтата и намалувањето на извозот. Во исто време, увозот на стоки од Русија во Кина е зголемен за 29 отсто, иако извозот од Кина стагнира“, рече Искандер Луцко, стратег во ИТИ Лондон (ITI London).
.webp){kind=icon}
