Вработените во УСАИД од петок не работат, запираат проектите во Македонија

Повеќето вработени во Американската агенција за меѓународен развој УСАИД (USAID) ќе бидат пратени на принуден одмор почнувајќи од петок.

Луѓето во „критични мисии“ и со „основни лидерски“ улоги ќе бидат изземени, според изјава објавена на веб-страницата на УСАИД во вторникот. Членовите на персоналот стационирани во странство мора да се вратат во рок од 30 дена, со исклучоци кои ќе се разгледуваат „случај по случај“, се вели во објавата.

Оваа агенција, која се соочува со проблеми, стана бојно поле во кампањата на претседателот Доналд Трамп и Илон Маск за реструктурирање на федералната влада.

Минатиот викенд, Маск повеќепати ја спомена УСАИД на X, социјалната платформа во негова сопственост, а Трамп ја опиша агенцијата како „водена од група радикални лудаци“. Како илустрација на нивниот амозитет кон оваа агенција може да послужи и изјавата од секретарката за односи со јавност на Белата куќа, Каролин Ливит, дека парите на американските даночни обврзници оделе за поддршка на проекти за различност, еднаквост и инклузија во повеќе земји како и поддршка на трансродови опери и стрипови.

 

 

Во понеделникот, државниот секретар Марко Рубио изјави дека сега тој е одговорен за УСАИД и ги предупреди американските законодавци дека агенцијата може да биде укината по ревизијата на нејзините операции.

Овие нарушувања се осудени како напад врз агенцијата и авторитетот на Конгресот, кој донесе закон за кодификација на УСАИД и ја финансира, при што некои демократски членови ветија дека ќе се борат против тоа.

УСАИД управуваше со повеќе од 43 милијарди долари во одобрени средства во фискалната 2023 година, при што поголемиот дел се потрошени во Европа и Евроазија, а потоа во Супсахарска Африка.

Изјавата, која не е потпишана, завршува со реченицата „ви благодариме за вашата служба“.

УСАИД како американска агенција за меѓународен развој, во Македонија е активна од 1993 година со активности во насока на јакнење на институционалните капацитети со цел истите да станат поодговорни кон граѓаните. 

Во тој контекст агенцијата финансираше проекти насочени кон зголемување на растот на приватниот сектор, активности за зајакнување на граѓанското општество и зголемување на професионалноста на независните медиуми, јакнење на доброто владеење и создавање можности за соработка помеѓу училиштата и поттикнување на меѓуетничката кохезија помеѓу младите.

Токму поради ова, запирањето на активностите на УСАИД ќе погоди многу проекти во земјава, како и луѓето кои работеле на нив и на подобрување на демократските капацитети преку невладиниот сектор. 

Вчера и премиерот Христијан Мицкоски имаше изјава во однос на замрзнувањето на програмата, па посочи дека овој потег треба да нè освести и да сфатиме дека во иднина ќе треба самите да градиме општество кое ќе биде заедничко.

„Секоја поддршка во насока на подобрување на демократските капацитети на една држава е добредојдена. Но и ова треба да нè освести и да нè отрезни и да сфатиме дека во иднина ќе треба самите за себе да се грижиме, самите да градиме општество кое што ќе биде наше заедничко општество, без разлика на нашите политички разлики, етнички, верски...“.

Во моментов нема коментари за веста. Биди прв да коментира...

Остави коментар