Матичната компанија на „Гугл“ (Google), „Алфабет“ (Alphabet Inc.), пријави приходи и добивка во првиот квартал што ги надминаа очекувањата на аналитичарите, поттикнати од добрите резултати на компанијата во областа на огласувањето во пребарувањето.
Продажбата во првиот квартал, без исплата на партнери, изнесува 76,5 милијарди долари, соопшти компанијата во четвртокот. Аналитичарите во просек очекуваа 75,4 милијарди долари, според податоците собрани од „Блумберг“. Нето-добивката изнесуваше 2,81 долара по акција, во споредба со процената на Волстрит од 2,01 долара.
Акциите, кои годинава паднаа за 16 проценти, се зголемија за повеќе од пет проценти во продолженото тргување по објавувањето на извештајот.
„Алфабет“ мора да го одржи замавот во огласувањето во интернет-пребарувањето и бизнисот со облак за да ги оправда своите зголемени инвестиции во вештачка интелигенција (ВИ). Конкуренцијата ги наведува компанијата и нејзините ривали интензивно да инвестираат во инфраструктура, истражувања и таленти. Додека „Гугл“ има корист од тоа што стартапите за ВИ трошат пари на неговиот облак и деловни алатки, исто така се натпреварува во развојот на решение што би било соодветен одговор на популарните четботови за разговор, кои потрошувачите сè повеќе ги доживуваат како алтернатива на користењето пребарување.
Почетниот одговор на „Гугл“ на таа закана – неговите „AI Overviews“ и „AI Mode“ во пребарувањето, каде што кратките одговори генерирани од ВИ доаѓаат пред линковите – досега бележат мешан успех. Во меѓувреме воведувањето на ВИ во пребарувањето на „Гугл“ сериозно го намали сообраќајот кон независните веб-сајтови.
Приходите на компанијата во првиот квартал вклучуваа „нереализирана добивка од осум милијарди долари од нашите хартии од вредност што не можат да се продаваат на отворен пазар, а поврзани се со нашата инвестиција во приватна компанија“, според поднесениот документ. Приватната компанија, која „Алфабет“ не ја именува во својот извештај, е компанијата „Спејс екс“ (Space Exploration Technologies Corp.) на Илон Маск, вели лице запознаено со случувањата, кое побара да остане анонимно бидејќи открива информации што не се јавни. „Гугл“ инвестира во „Спејс екс“ од најмалку 2015 година, кога се приклучи на ФИ (Fidelity Investments) во инвестиција од милијарда долари за комбиниран удел од околу 10 проценти, објави тогаш „Блумберг“.
„Гугл клауд“ донесе оперативен профит од 2,18 милијарди долари, надминувајќи ги очекувањата на аналитичарите од 1,94 милијарда долари, иако малку подзапре во остварувањето на очекуваните приходи. Резултатите укажуваат на тоа дека „Гугл“ можеби извлекува повеќе профит од бизнисот со облак, дури и додека продажбата забавува.
„Гугл“ остварува поголем профит од својот бизнис во облак, и покрај забавувањето на растот
Извор: Поднесоци од компанијата
Единицата за облак засега е најјасниот показател како процутот на ВИ придонесува за продажбата на компанијата, бидејќи стартапите на кои им е потребна поголема компјутерска моќ стануваат клиенти на „Гугл“. Иако „Гугл клауд“ сè уште заостанува на третото место, зад понудите на компаниите „Амазон“ (Amazon.com Inc.) и „Мајкрософт“ (Microsoft Corp.), ова е една од најважните области на раст за „Алфабет“. Веќе втор квартал по ред, компанијата забележа поголема побарувачка од клиентите отколку што имаше капацитети во своите датацентри, според зборовите на финансиската директорка Анат Ашкенази.
Поради тоа „Алфабет“ останува силно инвестирана во ВИ, зголемувајќи ја потрошувачката на сервери и датацентри. Капиталните расходи изнесуваа 17,2 милијарди долари во првиот квартал, што е малку повеќе од очекувањата на аналитичарите од 17,1 милијарди долари.
Огласувањето во пребарувањето генерираше приходи од 50,7 милијарди долари. Просечната процена на аналитичарите беше 50,3 милијарди долари. Оваа единица останува основен двигател на поширокиот огласувачки бизнис на „Гугл“ и забележа напредок во индустриите за осигурување, малопродажба, здравство и туризам, посочија раководителите на состанокот со инвеститорите по објавувањето на извештајот.
„Делумно очекував да видам пад на потрошувачката на огласувачите од секторот малопродажба поради економската неизвесност, но очигледно таа остана доста стабилна“, рече аналитичарот Јори Вумсер.
Тој дел од бизнисот се наоѓа под закана од разделување, откако федералните судии пресудија дека компанијата одржува нелегални монополи и во пребарувањето и во некои технологии за огласување. Во понеделникот во Вашингтон судијата Амит Мехта започна тринеделно рочиште за да се утврдат мерките за враќање на конкуренцијата во онлајн пребарувањето.
Видео-платформата на „Гугл“, Јутјуб (YouTube), која во февруари наполни 20 години, оствари приход од 8,92 милијарди долари, што е малку под процените на аналитичарите од 8,94 милијарди долари. Оваа единица, која направи голем исчекор кон поткастингот, неодамна објави дека милијарда луѓе месечно гледаат поткасти на нејзината платформа – надминувајќи ги и „Спотифај“ (Spotify Technology SA) и „Епл“ (Apple Inc.) во таа категорија. Јутјуб, кој поголем дел од своите приходи остварува од огласување, исто така забележа раст на претплатите, посочија раководителите за време на презентацијата за заработка.
Bloomberg
Оптимистичкиот извештај на „Алфабет“ поставува високи стандарди за неговите ривали во светот на дигиталното огласување, вклучувајќи ги компаниите „Мета“ и „Амазон“, кои треба да ги објават своите извештаи за заработка следната недела. Инвеститорите внимателно ги следат големите интернет-компании во потрага по знаци на нестабилност на пазарот на огласување или деловни нарушувања предизвикани од геополитички и трговски тензии.
Управниот одбор на „Алфабет“ одобри откуп на акции во вредност од 70 милијарди долари и ја зголеми дивидендата за пет проценти, на 21 цент по акција.
.webp){kind=icon}
