„Мистрал“ на пат кон вредност од 14 милијарди долари со нова рунда капитал

Францускиот стартап за вештачка интелигенција „Мистрал еј-ај“ (Mistral AI) е во финална фаза на инвестиција од 2 милијарди евра, со што компанијата се проценува на 12 милијарди евра (14 милијарди долари), вклучувајќи го и новото финансирање. Со оваа зделка „Мистрал“ ја зацврстува својата позиција како еден од највредните технолошки стартапи во Европа.

Ривалот на „Опен еј-ај“ (OpenAI) развива отворени кодни јазични модели, како и четбот специјално приспособен за европските корисници под името „Мачката“ (Le Chat), заедно со други ВИ-услуги. Компанијата е основана во 2023 година од Артур Менш, поранешен истражувач во „Дип мајнд“ (DeepMind), заедно со поранешните истражувачи од „Мета“ (Meta), Тимоте Лакроа и Гијом Лампл.

Менш одби да коментира, а портпарол на компанијата не одговори веднаш на барањето за коментар. Во текот на летово компанијата била во преговори за собирање средства до 1 милијарда долари во сопственички капитал од инвеститори, меѓу кои и фондот МГХ од Абу Даби.

„Мистрал“ се обидува да обезбеди свое место на полето во кое сè повеќе доминираат американските и кинеските големи јазични модели, а досега има собрано над милијарда евра од инвеститори низ светот, меѓу кои „Андрисен Хоровиц“ (Andreessen Horowitz), „Џенерал каталист“ (General Catalyst), „Лајтспид венчр партнерс“ (Lightspeed Venture Partners), „Бпифранс“ (Bpifrance) и „БНП Париба“ (BNP Paribas). Ова е првото финансирање на компанијата од јуни 2024 година, кога нејзината вредност беше проценета на 5,8 милијарди евра.

На почетокот на годинава основачот Артур Менш изјави дека компанијата размислува за надворешен капитал за да воспостави дата-центар во Франција. Освен разговорите за ново финансирање, „Мистрал“ неодамна водела и преговори за собирање стотици милиони евра во форма на долг за „Мистрал компјут“ (Mistral Compute), новата ВИ-услуга во облак во Франција, развиена во партнерство со „Енвидија“ (Nvidia Corp.) од француски кредитори, меѓу кои и „Бпифранс“, објави „Блумберг“.

Новата рунда на инвестиции доаѓа во време кога конкурентите како „Антропик“ (Anthropic) и „Опен еј-ај“ (OpenAI) ги зголемуваат своите фондови. „Опен еј-ај“ затвори голема рунда финансирање пролетоска, а неделава „Антропик“ со седиште во Сан Франциско обезбеди 13 милијарди долари во рунда финансирање, со што вредноста на компанијата достигна 183 милијарди долари, пренесе „Блумберг“.

 

Во моментов нема коментари за веста. Биди прв да коментира...

Остави коментар