Значителен раст на приходите на „Реплек“

„Реплек“ во периодот од 1 јануари заклучно со 30 септември годинава оствари приходи од 26 милиони евра, што е раст од 18 проценти во однос на истиот период минатата година, соопшти компанијата. Од продажбата на домашниот пазар во „Реплек“ реализирале приходи од 6,25 милиони евра, додека од странските пазари се остварени 19,74 милиони евра.

„Овие резултати се јасен показател дека нашата стратегија за одржлив раст, иновации и силно присуство на странските пазари дава резултати. Нашата компанија континуирано вложува во иновации, дигитализација, лансирање нови производи и проширување на пласманите, со цел да обезбеди повисок квалитет, поголема ефикасност и уште поголема сигурност и доверба од нашите деловни партнери, како и од пациентите“, изјави Душан Пецовски, генерален директор на „Реплек“.

Тој додаде дека „Реплек“ останува посветен на долгорочен развој што создава вредност, како за акционерите и вработените, така и за националната економија.

Од компанијата потенцираат дека вложувањата во модернизација, дигитализација и во проширување на пазарите се стратешки проекти кои ја зајакнуваат стабилноста и конкурентската предност.

„Една од тие инвестиции е преминувањето на SAP S/4HANA, од 1 октомври годинава, што обезбедува поголема транспарентност, усогласеност и конкурентска предност, како и неодамнешното пуштање во употреба на новата високо-технолошка линија за серијализација и пакување. Исто така, ‚Реплек‘ на почетокот на годинава отвори претставништва во Босна и Херцеговина и во Србија, а овие два пазари веќе го потврдија својот потенцијал и успешно ги реализираа своите први продажби“, информираат од компанијата.

Оттаму додаваат дека неодамна „Реплек“ доби уште едно значајно двојно меѓународно признание, односно успешно биле издадени два EAEU GMP сертификати.

„Тие се резултат на инспекции кои потврдуваат дека производствените процеси и системот за квалитет на ‚Реплек‘ се целосно усогласени со принципите на добра производна пракса регулирани за Евроазиската економска унија. Овие сертификати не се само административен документ, туку и сведоштво за високите стандарди што се применуваат во секоја фаза од работењето и постојаното подобрување на квалитетот на секој чекор, од развојот и производството, до финалната дистрибуција“, велат од „Реплек“.

Од компанијата објаснуваат дека ваквите сертификати се всушност единствен сет на правила за фармацевтските производители во земјите членки на Евроазиската економска унија, кои гарантираат дека лековите се произведуваат според највисоки стандарди за квалитет. Тие креираат дополнителни можности за пласман на производите на „Реплек“ на 183-милионскиот пазар на Евроазиската економска унија.