„Реплек“ со раст на консолидираната добивка од 22 проценти

„Реплек“ АД Скопје во периодот јануари-септември годинава оствари консолидирана нето добивка од 135,4 милиони денари (2,2 милиони евра), што е зголемување за 22 проценти во однос на истиот период минатата година кога консолидираната нето добивка изнесувала 110,7 милиони денари (1,8 милиони евра), покажува неревидираниот консолидиран биланс на успех на компанијата објавен преку Македонската берза.

Од компанијата информираат дека приходите од продажба на домашниот пазар изнесуваат 326 милиони денари (5,3 милиони евра) и се зголемени за 55 проценти во однос на истиот период во 2023 година. „Реплек“ бележи раст на продажбата на сите странски пазари, а единствено пазарите во ЕУ се со негативен тренд во однос на 2023.

„Очекувањето е дека во втората половина од 2024 ќе се врати нивото на продажба и кај овој пазар треба да видиме позитивен тренд во однос на 2023“, наведуваат од „Реплек“.

Во првиот квартал од 2024 година, „Реплек“ ја прошири својата географска присутност со реализација на првиот извоз кон новиот пазар во Туркменистан. 

„Амбициозните планови за овој пазар се поддржани од очекувањата за приходи од продажба во висина од милион евра во текот на 2024 година“, соопшти компанијата.

Инаку „Реплек“ годинава ги откупи правата за ексклузивно застапништво на линијата на производи на „ХелтЕид“ (HealthAid). „Реплек“ е ексклузивен застапник производите на „ХелтЕид“ за Македонија, Србија, Косово, Црна Гора, Босна и Херцеговина, Хрватска и Словенија.

„Кон крајот на март 2024 се реализираше првата продажба на домашен пазар, а во вториот квартал се воспоставија односи со партнери во регионот Адрија и се реализираа првите продажби во овој регион“, информираат од компанијата.