Пакетомати во Македонија: Приватната поштенска индустрија е во подем

Веројатно сте ги виделе големите автомати на кои пишува пакетомат. Можеби погледот ви прелетал преку нив, можеби сте од скептиците што не му веруваат на пакетоматот, па свесно го игнорирате, а можеби сте меѓу оние што го користат. Во секој случај, заклучокот е дека курирската индустрија во земјава веќе извесно време оди во нагорна линија, не само според обемот на работа како резултат на растот на е-трговијата туку и според подобрувањето на квалитетот на услугите, а и во однос на следењето на глобалните трендови.

Пакетоматите се во сопственост на компанијата „Карго експрес“, која нуди брза курирска служба низ земјава повеќе од две децении. Основана во 2003 година, компанијата е еден од пионерите во секторот за логистика и курирски услуги во Македонија. Во разговор за „Блумберг Адрија“ од компанијата велат дека фокусот не е само на брза туку и на паметна достава. Адаптацијата на технолошкиот напредок во логистичката индустрија, преку интегрирање софистицирани системи за следење и дигитални решенија за подобрување на транспарентноста и искуството на клиентите, а сега веќе и со развој на мрежа на пакетомати, овозможува компанијата да го рационализира работењето.

 

„Пазарот на поштенските и курирските услуги се наоѓа во период на големи промени. Развојот на технологијата, интензивното секојдневно користење интернет (друштвени мрежи, апликации) им овозможува на корисниците широка и брза достапност на стоки и услуги. Со тоа освен што се уриваат граничните препреки на трговската глобализација, исто така, се менуваат навиките на потрошувачите“, вели Билјана Глумац, управителка на „Карго експрес“, дополнувајќи дека денес цел и стратегија на една компанија е воведување т.е. имплементирање нови технологии што се релевантни за унапредување на нејзиното работење со цел да стане што поконкурентна на пазарот.

„Препознавајќи го потенцијалот на новите ‘паметни уреди’, тимот на ‘Карго експрес’ воведе нов проект - пакетомат или ‘locker’, со што уште еднаш потврдува дека останува доследен на унапредување во поштенскиот сектор преку иновативни пристапи и технолошки решенија“, вели Глумац.

Како практично функционира употребата на пакетоматите?

Пакетоматите се уште една придобивка од технолошкиот развој, бидејќи како „паметна машина“ обезбедуваат лесна и сигурна достава на пратките, со многу предности за корисниците.

„Оваа иновација му овозможува на корисникот да избере локација што нему најмногу му одговара, да изврши уплата (во случај ако тој треба да плати) преку електронско банкарство и по добиениот код преку смс-порака да ја подигне пратката. Кратко кажано, пакетоматите се уреди што на корисниците им овозможуваат самопослужување т.е. можат да ја преземат својата пратка во кое било време 24/7“, вели Глумац.

Пакетоматите функционираат речиси една година, откако беа инсталирани на крајот на 2024 година, а засега во функција се вкупно осум, од кои седум се поставени на повеќе локации во Скопје и еден во Битола.

„Развојот и афирмацијата на е-продажбата секако придонесоа за побрза дигитализација во логистичкиот сектор, а со тоа гледаме тренд на зголемување на популарноста на  пакетоматите“, вели Глумац, посочувајќи дека во наредниот период ќе се фокусираат на проширување на мрежата на пакетомати и интегрирање нови технологии што ќе овозможат уште поголема автоматизација и погодност за клиентите.

Гледано од еколошки аспект, смета таа, пакетоматите како самостојни уреди се најприфатлива, најисплатлива и најбрза опција за достава во модерниот свет, но и најчиста, со оглед на тоа што тие работат на соларна енергија.

„Очекуваме континуиран раст во овој сегмент затоа што корисниците ја препознаваат предноста на пакетоматите. Тие ќе станат не само стандардна услуга во големите градови туку и важен дел од инфраструктурата за достава во целата држава“, вели Глумац.

Инаку, податоците на компанијата покажуваат дека по падот на обемот на работа во 2021 година, односно годината во која владееше пандемијата на ковид, бројот на пратки оттогаш континуирано расте, така што ако се суди по доставите направени во првото полугодие, логично е да се очекува дека 2025 година ќе заврши со позначаен раст.

Таквиот тренд на работа, разбирливо, ја зголемува и потребата од работници, па ако во 2019 година во „Карго експрес“ работеле 171 лице, денес бројот на вработени во оваа компанија е за речиси 10 отсто поголем и изнесува 187.

Расте интересот за употреба на пакетомати во регионот

Споделувајќи го своето искуство, нашата соговорничка вели дека трендот на преземање пратки од пакетоматите во европските земји и кај нашите соседи од година на година расте и во овие автомати ја гледа иднината во

„Можеме со сигурност да кажеме дека од ден на ден и кај нас расте интересот за оваа услуга, која е прифатена многу позитивно од страна на корисниците. Пакетоматите се практични и флексибилни како за трговците така и за купувачите т.е. корисниците. Искуството покажува дека клиентите ја препознаваат предноста што пакетоматите ја нудат - брза и ефикасна достава, иновативни дигитални опции без документи“, вели Глумац, напоменувајќи дека целиот процес е дизајниран со една цел: достапност 24/7, едноставност, дискретност и сигурност. 

Големиот предизвик – „Тему“

„Блумберг Адрија“ веќе пишуваше за тоа како и колку влезот на „Тему“ на македонскиот пазар го раздвижи секторот за курирски услуги. Интернет-пазарењето е сѐ поактуелно меѓу потрошувачите, особено тие што не сакаат да се туркаат меѓу полиците во продавниците или да чекаат ред пред гардеробите во бутиците.

Дополнително, голем замав земаат светските гиганти во онлајн трговијата што нудат производи по значително пониски цени од тие што се продаваат во продажните салони. „Амазон“ и „Алиекспрес“ се меѓу најпопуларните за Македонците што сакаат да купуваат преку интернет, а секако, „Тему“ е предводник на таа треска.

Приватна архива

Последните податоци од Државниот завод за статистика што се однесуваат на прометот остварен во поштенските и курирските дејности се за второто тримесечје годинава, кое веќе традиционално се одликува со раст за разлика од првиот квартал, кој вообичаено се отсликува со пад на прометот во овој сектор. Конкретно по месеци, растот во април изнесува 18,2 проценти, во мај 41,4, а во јуни 17 отсто. Секако, поголем раст се очекува токму во наредниот период поради претпразничната шопинг-еуфорија, што вообичаено значи и повеќе нарачки, особено од овие е-продавници што нудат поевтини производи.

Од „Карго експрес“ велат дека како нов играч на пазарот на курирските услуги, „Тему“ донесе нови предизвици и можности за сите поштенски оператори. Според нив, конкуренцијата носи одредени предизвици, но истовремено и позитивни аспекти.

„Прво, зголемената конкуренција ги мотивира сите играчи да ги подобрат своите услуги и да бидат посоодветни на потребите на клиентите. Светот на е-продажбата ни дозволува неограничен избор, а пакетоматите ни даваат слобода во тој избор да ги диктираме нашето време и правила. Со оглед на сегашната слика на поштенскиот пазар, пакетоматите се сигурно една од најдобрите новини во секторот на курирските услуги. Со нив клиентите имаат поголема слобода и флексибилност да ја преземат својата пратка без притоа да договараат конкретен термин, а со тоа имаат удобност да располагаат со своето време“, вели Глумац.