Криопрезервација: Инвестиција во вечен живот со ризици и приноси како биткоинот

Криопрезервацијата е напредна медицинска процедура која човекот го става во целосна биолошка пауза по неговата законска смрт. Целта е да се зачува телото сè додека медицинската технологија не напредува доволно за да ја излечи причината за смртта и да овозможи оживување. Иако звучи како научна фантастика, зад оваа идеја стои комплексен бизнис-модел со конкретни одговори на прашањата за долгорочна одржливост, поврат на инвестициите и регулаторни ризици.

Емил Кенџиорa, коосновач и извршен директор на компанијата Tomorrow Biostasis, една од водечките европски компании во оваа област, ја откри финансиската и оперативната позадина на бизнисот заснован на надеж во иднината.

Финансиска тврдина на вечноста

Едно од клучните прашања за секој што размислува за стогодишен „сон“ е што гарантира дека средствата за одржување ќе бидат безбедни низ децении, па дури и векови. Коосновачот на компанијата објаснува дека целиот систем е поставен околу швајцарска фондација.

„Долгорочната структура на одржување се темели на швајцарска фондација. Тие го издржале тестот на времето и се врзани за својата намена. Дури и ако идното раководство посака со средствата да направи нешто друго, тоа не би било возможно.“ Намената, секако, е одржување на клиентите во криостаза (состојба на длабоко замрзнување) и, кога тоа ќе стане возможно, нивно оживување.

Капиталот се инвестира во нискоризични, долгорочни вложувања како што се ЕТФ-фондови кои го следат Nasdaq и S&P 500. Иако на краток рок не се сметаат за целосно безбедни, на инвестициски хоризонт од 60 до 80 години ризикот значително се намалува. На тој начин се заштитуваат од инфлација и катастрофални економски настани.

Tommorow bio

Криопрезервацијата како moonshot инвестиција

Како да се убедат софистицирани инвеститори да вложат огромен капитал во услуга чија испорака не е докажана и временски е неограничена? Извршниот директор е јасен: „Ова треба да се гледа како moonshot. Не е за луѓе кои инаку би инвестирале во S&P 500, туку за оние кои сакаат дел од својот имот да го алоцираат во инвестиции со потенцијално исклучително висок поврат.“

Тој го споредува вложувањето во биостаза со раното инвестирање во биткоин – висок ризик што донесе огромни приноси. Бизнис-моделот за криопрезервација се темели на претплати и е блиску до профитабилност, а вистинскиот „биотехнолошки поттик“ ќе се случи во моментот кога оживувањето ќе стане можно.

Бидејќи класичен излез преку ИПО (IPO) или аквизиција не е веројатен, повратот за инвеститорите – претежно поединци со ултрависока нето-вредност и семејни канцеларии – е планиран преку дивиденди откако компанијата ќе стане профитабилна. Вистинскиот финансиски успех, па дури и можен ИПО, би се случил дури по научен пробив, на пример успешно оживување на цицачи како глувци. „Прилично сум сигурен дека, ако можете да враќате луѓе од мртвите, повратот на инвестицијата не би бил проблем“, заклучува тој.

Трка со времето и законите

Европа е позната по строгата регулатива. Што ако некоја голема европска држава ја прогласи биостазата за нелегална? „Малку е веројатно дека тоа ќе се случи, бидејќи трендовите одат кон поголема слобода на поединецот. Сепак, како мерка на претпазливост веќе градиме втор објект за долгорочно складирање во друга држава, на друг континент“, објаснува Кенџиорa. Повеќе локации низ светот служат како заштита од геополитички ризици.

Сепак, најголемиот оперативен предизвик не се регулаторите, туку логистиката. „Клучниот логистички предизвик се медицинските тимови за итни интервенции. Процедурата на криопрезервација мора да започне многу брзо откако срцето ќе престане да чука и лицето законски ќе биде прогласено за мртво.“

Ова бара мрежа на тимови распоредени низ Европа, подготвени за брза реакција во Лондон, Мадрид или Рим. Во моментов имаат капацитет за пет до десет пати повеќе случаи отколку денес, но проширувањето на таа мрежа останува постојан предизвик.

Предност пред конкуренцијата и научен углед

Во што Tomorrow Biostasis се разликува од американските конкуренти? Кенџиорa наведува два клучни елемента: технологијата и правната структура. „Користиме поинаков раствор за заштита од замрзнување кој овозможува ладење на телото без формирање мраз, што би ја оштетило клеточната структура. Нашите годишни извештаи за квалитет покажуваат значително подобри резултати од било кој друг во светот“, тврди тој. Правно, компанијата ја комбинира агилноста на стартап, која овозможува иновации, со долгорочната стабилност на швајцарската фондација.

А што ако научната заедница ја отфрли криопрезервацијата како псевдонаука? Тој истакнува дека таква репутациска криза би имала мал ефект врз фондот што ги чува клиентите, бидејќи тој е финансиски одвоен од работењето на компанијата и од новите пријави. Дополнително наведува дека неодамнешните студии се охрабрувачки: околу 70 проценти од анкетираните невронаучници сметаат дека сегашните методи ги зачувуваат мозочните врски во кои е складирана долгорочната меморија, а речиси една третина од лекарите сметаат дека оживувањето во иднина е можно.

Да ја споменеме на крај и цената. Вистинска ситница. Целото тело чини 200 илјади евра. Ако сметате дека телото и не ви е од голема корист, постои опција за криопрезервација на мозокот. Тоа ќе ве чини 75 илјади евра.

Бизнисот со криопрезервација повеќе не е само научна фантастика, туку сериозен потфат со јасна стратегија. Иако се темели на надеж во технологијата на иднината, неговиот бизнис-модел е цврсто вкоренет во сегашноста, со јасни планови за управување со финансиските, регулаторните и оперативните ризици. За клиентите и инвеститорите, тоа и понатаму е облог на иднината, но на крајот — која инвестиција не е?

 

--Целиот разговор погледнете го во видеото.