Двоцифрен пад на продажбата на „Порше“ - најголем пад по финансиската криза

Испораките на „Порше“ (Porsche AG) минатата година паднаа за 10 проценти, што е најголем пад од 2009 година, кога глобалната финансиска криза ги потресе пазарите, по слабата побарувачка за електрични возила и падот во Кина.

Луксузниот бренд на „Фолксваген“ (Volkswagen AG) лани испорача 279.449 возила, соопшти компанијата во петокот, при што Кина и Германија го предводат падот на продажбата. Од „Порше“ рекоа дека продажбата ја ограничија и „јазовите во понудата“ за верзии со мотор со внатрешно согорување на спортскиот автомобил 718 и спортското теренско возило „макан“.

 

„Порше“ се бореше со низа предизвици, вклучувајќи ја и корекцијата на претерано амбициозното воведување електрични возила, што ги помести плановите за моделите и ги оптовари маржите. Царините во САД - земјата што ја надмина Кина како најважен пазар на „Порше“ - исто така влијаеја на профитот.

Bloomberg Mercury

 

Компанијата, која испадна од германскиот индекс DAX, вети подобрување по бурната 2025 година, кога дури четири пати ги намали своите прогнози. Падот на „Порше“ доаѓа во критичен момент за матичната компанија „Фолксваген“, која се потпира на профит од своите премиум брендови, вклучувајќи го и „Ауди“ (Audi).

Михаел Лајтерс, поранешен главен извршен директор на „Мекларен аутомотив“ (McLaren Automotive Ltd.), ја презеде функцијата на 1 јануари, со што заврши двојната улога на Оливер Блум како главен извршен директор на „Фолксваген“.

Главниот финансиски директор Јохен Брекнер во октомври изјави дека иако 2025 година ќе биде најслаба година, враќањето на двоцифрени маржи ќе биде цел за годините што доаѓаат по 2026 година.