„Спејс екс“ на Маск „доверливо“ би се регистрирала за ИПО веќе во март

„Спејс екс“ (SpaceX) планира т.н.  доверливо поднесување на регистрација за иницијална јавна понуда (ИПО) уште следниот месец, според луѓе запознаени со ова прашање, бидејќи компанијата за ракети и сателити на милијардерот Илон Маск продолжува со плановите за најголемата котација во историјата досега.

Фирмата со седиште во Старбејс, Тексас, очекува да ја достави својата нацрт-регистрација за ИПО до Комисијата за хартии од вредност на САД во март, велат изворите. Таквиот потег би ја одржал на добар пат за ИПО во јуни, што би било првото од можното трио на мега-ИПО-а, по што потенцијално ќе следат „Опен еј-ај“ (OpenAI) и „Антропик“ (Anthropic PBC).

Размислувањата се во тек, деталите би можеле да се променат и „Спејс екс“ сепак би можел да го одложи поднесувањето, велат изворите.

„Спејс екс“ би можел да побара вреднување при ИПО-то од повеќе од 1,75 билиони долари, велат изворите, барајќи да не бидат идентификувани бидејќи разговорите се приватни. Компанијата веќе го купи стартапот за вештачка интелигенција на Маск  „Екс Еј Ај“ (xAI) во февруари, зделка по која проширениот бизнис ентитет беше проценет на  1,25 билиони долари, објави “Блумберг Њуз“.

При доверливо поднесување за ИПО, компаниите можат да добијат повратни информации од регулаторот и да направат промени пред информациите да станат јавни.

Претставник на „Спејс екс“ не одговори веднаш на барањето за коментар.

Котирањето на „Спејс екс“  би можело да прибере  дури 50 милијарди долари, велат луѓе запознаени со подготовките. Со тој износ, тоа би било поголема иницијална понуда од моменталниот рекордер, дебито на саудиската нафтена компанија „Сауди Арамко“ (Saudi Aramco) од 29 милијарди долари во 2019 година.

Bloomberg

 

Со пазарна вредност од 1,75 билиони долари, „Спејс екс“ би бил поголем од сите освен од пет компании во индексот S&P 500 – „Енвидија“ (Nvidia Corp.), „Епл“ (Apple Inc.), „Алфабет“ (Alphabet Inc.), „Мајкрософт“ (Microsoft Corp.) и „Амазон“ (Amazon.com Inc). Според таа метрика, би бил поголем и од „Мета“ (Meta Platforms Inc.), како и од самата „Тесла“ (Tesla Inc.) на Маск.

Провајдерот на сателитска телевизија и безжична мрежа „Екостар“ (EchoStar Corp.) има удел во „Спејс екс“ како резултат на продажбата на безжичен спектар минатата година на фирмата на Маск. Акциите на „Екостар“ скокнаа за дури 10 отсто во петокот, најмногу од декември. Во меморандум, „Спејс екс“ изјави дека се подготвува за можно ИПО во 2026 година, чија цел би била финансирање на „неверојатниот обем на летови“ за нејзината развојна ракета „Старшип“, како и на центри за податоци за вештачка интелигенција во вселената и база на Месечината.

„Спејс екс“ ги ангажираше „Банката на Америка“ (Bank of America Corp.), „Голдман Сакс“ (Goldman Sachs Group Inc.), „ЏП Морган“ (JPMorgan Chase & Co.) и „Морган Стенли“ (Morgan Stanley) за најодговорните операции во ИПО-то, изјавија луѓе запознаени со ова прашање. Компанијата размислува за структура на акции од т.н.  дуална класа во ИПО-то што потенцијално би им дала на инсајдерите како што е Маск дополнителна моќ на гласање за да доминираат во донесувањето одлуки, објави Блумберг Њуз.

Најактивната компанија за лансирање ракети во светот, „Спејс екс“, доминира во вселенската индустрија со својата ракета „Фалкон 9“ (Falcon 9) што ги крева сателитите и луѓето во орбитата. Компанијата е фокусирана на изградба на база на Месечината пред да ја продолжи својата долгогодишна мисија за испраќање луѓе на Марс, рече Маск.

„Спејс екс“ е исто така лидер во индустријата за обезбедување интернет услуги од ниската орбита на Земјата преку „Старлинк“ (Starlink), систем од илјадници сателити што им служи на милиони клиенти.

-Со помош на Loren Grush