Каква е бизнис-климата во државата за инвестиции во проекти за одржлив развој и придонес кон заштита на животната средина?
„Зелената агенда ќе биде нешто што ќе мора да го прифатат сите компании и да преземат активности, во иднина сигурно ќе имаме и притисоци од ЕУ за бизнисите да бидат дел од промените“, вели Олга Рајчиќ од компанијата „Грин ај-ти“ (GreenIT), чија апликација „Челинџер“ (Challenger) е дел од кампањата #WeArePlay на „Гугл плеј“ за иновации што имаат корисно влијание врз околината.
Нивната апликација ги наградува луѓето со поени секогаш кога користат одржлив транспорт. Рајчиќ посочува и дека новоформираната зелена бизнис-лига има за цел заштеда од 365 тони јаглеродни емисии годишно.
„Мотивација дефинитивно ни беше аерозагадувањето во Скопје. Сакавме да ги мотивираме нашите сограѓани да пешачат, да возат велосипед односно да користат алтернативни начини на транспорт, да ги остават своите автомобили, а со тоа да ги заштедиме јаглеродните емисии во воздухот. Така започнавме и стигнавме до 10.000 корисници, но решивме дека е потребно да се осврнеме кон компаниите на домашниот пазар и да ги мотивираме и тие да бидат дел од оваа промена во нашето општество што сакаме да ја направиме. Токму од неодамна започнавме соработка со големи компании, каде што ги мотивираме нивните вработени меѓусебно да се натпреваруваат и да собираат зелени километри и со тоа да се штедат јаглеродните емисии во воздухот. Многу сум среќна дека вчера ја лансиравме и првата зелена бизнис-лига во Македонија, каде што се вклучени 26 македонски компании и заедно со нивните вработени имаме една цел, а тоа е да заштедиме 365 тони јаглеродните емисии во воздухот, тоа значи еден тон дневно заштеда на јаглеродните емисии во воздухот. Се надевам дека ова ќе биде еден убав почеток како да се мотивираат компаниите да бидат дел од оваа зелена агенда и на поинаков начин да покажеме дека компаниите се подготвени да носат промени во нашето општество и да дадеме пример и сето ова да се прошири и на целиот Балкан. Ова го правиме со стратегиски партнер – ’Триглав осигурување’, кој ќе ги наградува најдобрите вработени во компаниите што се дел од оваа зелена лига“, вели таа.
Иако гледа позитивен тренд на македонскиот пазар дека компаниите сакаат да внесат иновативност, да бидат дел од зелената агенда, Рајчиќ вели дека е добредојдена и државна помош.
„Можеби ова е размислување надвор од рамките, но кога ја создававме оваа зелена бизнис-лига, сакавме да создадеме компании што ќе ги признаеме како компании што заштедиле најмногу јаглеродни емисии во првите три компании. Сега, замислете кога државата некако би им дала даночно олеснување на компаниите што навистина се трудат да направат нешто по ова прашање. Од друга страна, кога самата држава би помогнала со различни грантови шеми во донесувањето или во спроведувањето некои зелени активности во компаниите, мислам дека тоа би било многу голем поттик. Но многу е важно исто така да се промовираат и позитивните примери. Што е тоа што се случува кај компаниите, какви практики спроведуваат компаниите во нашата држава? Некако тие повеќе да бидат видливи за целото општество, а наедно и да им даваат пример на преостанатите нивни конкуренти на пазарот, сè со цел некако да се бориме и да стануваме подобри во тој аспект. Така што мислам дека се потребни два елемента - покрај финансирањето, дефинитивно признанија и некои даночни олеснувања за компаниите што спроведуваат вакви зелени активности и ќе бидат дел од зелената агенда“, вели таа.
.webp){kind=icon}
