.webp){kind=icon}
Преговорите со сите засегнати страни во однос на прашањето за увоз на работна сила Владата планира да ги финишира за два месеца, по што ќе се знае во која насока ќе се одвива ова прашање. Вицепремиерот Битиќи очекува дека увозот на работна сила ќе значи и поголема продуктивност.
„Мислам дека е дојдено време веќе да ја отвориме дискусијата за потребата од дополнителна работна сила на пазарот на трудот. Свесни сме дека треба да работиме на доквалификација и реквалификација на одредена група невработени во Македонија за да ги приспособиме на потребите на пазарот, но мора да се најде начин да се дополни одливот на работници што се случува во последните петнаесетина години“, вели за емисијата „Зум ин“ на ТВ Блумберг Адрија вицепремиерот за економски прашања Фатмир Битиќи.
Според него, тоа што од пред две години започна иницијативата за слободно движење на луѓето од Западен Балкан ќе претставува потенцијал и олеснување во делот на пазарот на трудот и покривање на недостигот од работници, иако тој се надева и на работници од сите земји што имаат пониска стапка на развој и понизок животен стандард од македонскиот.
„Ние примарно работната сила ја бараме од тие што се активни баратели на работа, но констатација на сите, вклучувајќи ги и тие што се невработени, е дека нивните вештини не одговараат на потребите на пазарот на трудот. Треба да признаеме дека, за жал, во изминатите 15-20 години продуцираме кадар што не ги следи потребите на економијата и на пазарот на трудот, туку продуцираме кадар чии квалификации во суштина се добри, но во овој момент тоа што се бара во економијата не одговара“, вели Битиќи и потенцира дека токму затоа е потребна преквалификација на активните баратели на работа, особено ако се земе предвид фактот дека не станува збор за висококвалификувани кадри, туку за трудоинтензивни дејности, како што се градежништвото, туризмот, сезонските работници во земјоделството и други сектори.
За работодавците увозот на работна сила е решение за недостигот од работници на пазарот на трудот, но, секако, сметаат дека треба да се земе предвид и преквалификацијата на работниците што се невработени. Според Миле Бошков, претседател на Бизнис-конфедерацијата на Македонија, земјава може да увезе работници само од Пакистан, Ирак, Иран и Авганистан, зашто во сите други држави има повисоки плати од нашите.
„На пазарот има сериозен недостиг од вешта работна сила, па затоа, според стандардот на работниците и платите во регионот и пошироко, сметаме дека ќе мора да се потпираме на работна сила што ќе мора да ја донесеме од Блискиот и Далечниот Исток, а можеби и од други континенти“, вели Бошков, потенцирајќи дека мора да се ревидираат политиките за социјална помош, за поддршка на отворање бизнис, политиките за поттикнување вработувања и инвестиции итн.
Во однос на тоа дали увозот на работна сила ќе има влијание врз зголемувањето на продуктивноста, Бошков вели дека тоа може само да го замени недостигот од работна сила на пазарот на трудот, а продуктивноста зависи исклучиво од поставениот систем, управувањето, раководењето, мотивацијата и нормално платите, кои, за жал, во Македонија се мали, но превисоки за одреден број работодавци.
„Но платите и работната сила не се изолиран однос, зашто има уште многу други работи што не се во ред во бизнис-опкружувањето“, вели Бошков, кој во разговорот отвора уште неколку проблеми за работодавците, освен работната сила.
Во емисијата „Зум ин“ вицепремиерот Битиќи зборува и за тоа како образованието да одговори на овој предизвик во креирањето соодветни кадри потребни на реалниот сектор и какви реформи се потребни во таа насока. Вицепремиерот зборува и за зголемувањето на минималната плата, кое, според него, секако ќе биде над 20.000 денари. Тој го отвора и прашањето за заедничките економски проекти со соседна Бугарија и нивната потенцијална загрозеност од политичките превирања.
Целиот разговор со вицепремиерот за економски прашања Фатмир Битиќи и претседателот на Бизнис-конфедерацијата на Македонија, Миле Бошков, погледнете го во видеото.
