.webp){kind=icon}
„Грешката со поништувањето на претходната еврообврзница скапо ќе нè чини и тоа не смее да се повтори“, вели во интервју за „Блумберг Адрија“ даночниот експерт Павле Гацов.
Објаснувањата од Владата дека поништувањето на претходната обврзница е поради процедурални причини и дека државата нема да плати дополнителни средства, со оглед и на стоте милиони евра од инструментот за макрофинансиска поддршка на Европската комисија, според Гацов, е обид за релативизирање на случајот.
„Премногу е лесно кога се работи со туѓи пари, мислам на парите на даночните обврзници, да се даваат ваквите изјави. Се разбира дека е важно да се однесуваат одговорно, да внимаваат на секој денар, а не на милиони евра, бидејќи значително беше зголемена каматата на еврообврзницата поради порастот на каматната стапка. Се разбира, трошокот на една еврообврзница е токму каматата, тоа ја прави поскапа или поевтина. Во ваков случај очигледно дека ние зедовме малку помала сума во апсолутна вредност еврообврзница, но од друга страна ќе платиме иста или речиси повисока вредност во однос на претходното задолжување. Oвој обид да се комбинира заедно со оној додаток од ЕУ е само обид да се релативизираат работите, мислам дека вакво нешто во иднина не смее да се повтори“, вели даночниот експерт.
Тој додава дека е неопходно да се уредат процедури што ќе ги исклучат ваквите пропусти.
Гацов ги коментира и владините мерки во насока за борба со инфлацијата преку ограничување на цените, за кои вели ќе дадат само краткорочен ефект и се обид за „гаснење пожари“.
„Ова не се популарни мерки, многу подобра мерка би било развивање на страна на понудата“, вели Гацов.
Тој во интервјуто зборува и за очекувањата за движењето на БДП годинава, како и за трендот на намалување на инфлацијата.
„Сè уште не е скршен ’рбетот на инфлацијата и треба да се држи под контрола и да се зголеми основната каматна стапка барем уште двапати. Еве, сега, пролетва и во летните месеци да се реагира уште еднаш ако не се движат работите добро“, вели тој.
