Договорот со „Бехтел и Енка“ за изградба на коридорите и начинот на кој се туркаат брзи законски измени испраќа лоша порака и до меѓународната бизнис-заедница, смета Миша Поповиќ од Институтот за демократија.
„Се демонстрира една слика за земјата во која за оние големи инфраструктурни проекти каде што и меѓународните компании имаат интерес, бидејќи несомнено нашата држава ја отвора својата економија кон надвор, дека заинтересираните страни всушност треба претходно да посветат време на преговори со политичарите, бидејќи очигледно тоа е начинот на добивање договори, за разлика од вообичаениот и очекуван начин преку јавна и компетитивна процедура. Мислам дека тоа не привлекува компании што имаат добра репутација и значајни дострели во деловниот интегритет и заштитата на корупцијата од нивна страна, од страна на приватниот сектор, туку многу повеќе е сигнал за оние компании што сакаат да играат по непишани правила и да оперираат во земјава со јавните набавки во иднина“, вели Поповиќ во интервју за „Блумберг Адрија“.
Додека власта ги брани секој член од договорот и предложените законски решенија, експертите бараат повлекување на истите тие и со анализи и дебата да се утврдат придобивките и ризиците од штети.
„Со законските измени се воведуваат исклучоци за овој проект и за потенцијални идни проекти од т.н. стратегиско значење што излегуваат од општите правила. На пример, зголемен број на часови на работната недела, поинакви процедури за експропријација на земјиште, начинот на кој се справува градителот со шумскиот фонд на кој ќе наиде, минералните суровини, како се заштитува и пријавува културното наследство при градење итн., што всушност е нов сет на ризици што ги намалуваат можностите и механизмите за заштита вградени во веќе постојните закони. Ова туркање оневозможува практично оние што ја носат одлуката на крајот, а тоа се пратениците, да бидат информирани за што ќе гласаат. Договорот се држи во тајност, но и предложените измени на закони не се проследени со доволна анализа и образложение за тоа кои се позитивните и негативните фактори што ќе се создадат при овие измени. Тоа практично го намалува доброто управување во земјата“, вели Поповиќ.
Македонија веќе беше предмет на критика од страна на Европската комисија бидејќи договорот со „Бехтел и Енка“ беше склучен во директни преговори, заобиколувајќи го Законот за јавни набавки. Според Поповиќ, целиот процес ќе се најде и во новиот извештај за состојбите во земјава.
„Лично, мислам дека ќе се истуркаат овие измени вака како што се предложени, за жал. Таквиот начин на носење одлуки со зголемени ризици ќе си го најде своето место во оцената на Европската комисија за состојбата во земјата, која веќе и во претходниот извештај го нагласи овој проект како проблематичен, бидејќи не се почитуваат принципите вградени во Законот за јавни набавки, во кој се предвидени транспарентност и конкурентност при располагањето со јавните пари и доделувањето договори, особено договори од ваков обем, кои ќе чинат 1,3 милијарда евра, а веројатно и повеќе“, вели Поповиќ.