.webp){kind=icon}
Доколку се прифатат барањата на енергетските компании што веќе доставиле свои предлози до Регулаторната комисија за енергетика, цената на електричната енергија ќе се зголеми за околу 13 отсто. Ова го истакна во интервју за „Блумберг Адрија“ Марко Бислимоски, претседателот на Регулаторната комисија за енергетика, но вели дека е против нагорна корекција на цените.
„Во овој момент ги анализираме податоците што ни ги доставија, во своите барања имаат наведено дека сакаат да им се зголеми цената за вршење на нивните енергетски дејности. Според она што го гледам првично, не гледам дека има толкав простор за зголемување на нивните цени што ги бараат, така што не верувам дека ќе има некое поместување на цената на електричната енергија каде што бараат овие компании. Но, најважна е цената по која ЕСМ ќе се продаде на ’ЕВН хоум’ на тендерот за универзалниот снабдувач, кој треба да биде следната недела, исто така и тендерот за загуби на електрична енергија во дистрибутивната мрежа. Така што кога ќе ги добиеме овие податоци, РКЕ ќе ја донесе својата одлука. Инаку, јас сум против зголемување на цената на електричната енергија во овој момент. Ние во нашите калкулации како цена за набавка на електрична енергија за покривање загуби во преносна мрежа сме влегле со цена од 220 евра за мегават-час, таа сега е многу пониска на слободниот пазар, верувам дека такви поместувања ќе има и кај другите компании“, вели Бислимоски.
Претседателот на Регулаторната комисија потенцира дека енергетските компании треба да работат на зголемување на својата ефективност и намалување на трошоците.
„Компаниите треба да знаат дека треба да работат на подобрување на својата ефикасност, исто така и на намалување на своите трошоци, таму каде што можат да влијаат. Така што од тој аспект РКЕ нема да се повлече, ќе бара подобрување на ефикасноста и оптимизирање на нивните трошоци онаму каде што можат. Таму каде што не можат, како што е набавка на електрична енергија за загуби на тендер, таму не може никој да влијае, тоа е пазарна работа и какви се цените на пазарот таква ќе биде и понудата. Но кажувам дека во текот на денот има евтина електрична енергија и, со сите мерки што ги преземаме, на најголемиот производител на државата и на универзалниот снабдувач им даваме сигнал да купуваат електрична енергија во текот на денот, особено ЕСМ, за да може да си ги чува водата и јагленот за понатаму, за претстојната грејна сезона. Сега е најважно да ги направиме подготовките за да имаме уште една успешна грејна сезона“, вели Бислимоски.
„Едноставно, дојде време кога сите активности што ги презедовме во изминатите две години, во текот на енергетската криза, треба да ефектуираат со резултати“, додава тој и ги нагласува зголемените инвестиции во алтернативни извори на енергија.
„Особено треба да се земе предвид дека само за 17 месеци во државата се изградени нови 256 мегавати обновливи извори. Само годинава имаме нови 104 мегавати фотоволтаични електроцентрали и, како и на македонската берза така и на најголемата регионална берза во Унгарија, цената на електричната енергија во дневните часови е двапати пониска отколку во периодот по 19 часот. Така што има простор да разговараме за одржување на цената на електричната енергија на едно стабилно ниво“, вели Бислимоски.
Што се однесува до враќањето на дневната евтина тарифа на струјата, Бислимоски е дециден дека тоа ќе се случи, но вели дека претходно мора да се регулира со броилата и блок-тарифите.
Целиот разговор погледнете го во видеото во рамките на објавата.
