.webp){kind=icon}
„Во мај имаме раст на индустриското производство од 6,1 отсто, но сепак бројките за првите пет месеци споредено со првите пет месеци од претходната година покажуваат раст од еден отсто, што значи дека само податоците од мај дадоа можност да бидеме во позитива“, вели во интервју за „Блумберг Адрија ТВ“ Виктор Мизо, претседател на Советот на странски инвеститори.
„Ако ја гледаме преработувачката индустрија, имаме голем раст во мај од 5,3 отсто, но сепак сме за половина процент пониско во првите пет месеци споредно со минатата година. Она што се случува во мај е позитивно за целата економија, но предизвиците постојат. Сепак, треба да земеме предвид каква е побарувачката во земјите од Западна Европа, а особено во Германија, како наш најголем извозен пазар. Гледаме дека Германија е формално во рецесија, а прогнозите се дека рецесијата ќе биде подлабока од првично очекуваната и економската активност ќе биде помалку изразена идната година, што значи треба да очекуваме предизвици и ако продолжиме со мало позитивно зголемување на индустриското производство, тоа ќе биде позитивен резултат за нашата економија“, вели Мизо.
Тој појаснува дека автомобилската индустрија минатата година го достигна дното. Во периодот по 2017 година, кога беше врвот на продажба на возила во Европа, сето она што се случуваше со пандемијата, потоа проблемите со нарушените синџири за снабдување, па украинската криза, доведе до тоа минатата година да ја имаме најниската продажба на возила на европскиот пазар.
„Во првите пет месеци од оваа година имаме драстично зголемување на продажбата на возила во Европа од 18 отсто. Но, сепак, тоа е речиси една четвртина помалку од она што се случуваше во 2019 година, пред коронавирусот. Јас би рекол дека ова зголемување пред сè е поради онаа побарувачка на возила што беа нарачани минатата година, каде што се чекаше и по шест, 12, па и повеќе месеци за да се испорачаат тие возила поради недостигот од чипови. Тој проблем сè уште постои, но не е толку изразен колку што беше минатата година. Но, гледаме дека побарувачката за идни нарачки во Западна Европа во втората половина од годината ќе биде побалансирана поради сè уште високата инфлација и ниските стапки на економски раст, а, како што кажав, Германија и земјите околу неа или се во рецесија или се околу позитивна нула на економски раст. Затоа не очекуваме високи двоцифрени стапки на раст. Но, годината ќе биде подобра од минатата, така што од таа гледна точка ќе има подобрување, но подобрувањето ќе биде избалансирано“, вели Мизо.
Тој посочува дека Советот на странски инвеститори, поточно новиот состав на Управниот одбор, веќе имал средба со вицепремиерот Фатмир Битиќи и дека на средбата било истакнато барањата на инвеститорите да бидат реализирани годинава бидејќи следната година е изборна.
„Најверојатно следната година ќе биде изборна година, и нема да има многу економски теми и можности за промена на регулативи и закони, па затоа би требало да се реализираат сега“, вели Мизо.
Тој додава дека меѓу важните барања што биле испорачани е продолжување на хармонизацијата на царинските стапки, нешто што минатата година беше направено со над 250 царински стапки што беа усогласени и што помага за конкурентноста на производството во Македонија, независно дали се домашни или странски компании.
„Потоа побаравме промена во делот на сметководствените стандарди, односно да се воведат глобалните сметководствени стандарди, бидејќи во Македонија сега се користат сметководствени стандарди од 2009 година. Добивме ветување дека тоа ќе се случи постепено и етапно од почетокот на идната година и странските компании ќе бидат први што треба да го користат тоа. Но исто така побаравме и Советот за странски инвестиции да биде вклучен во работни групи при креирањето на економските закони“, вели Мизо.
Тој посочува дека ако две третини од овие барања бидат усвоени до крајот на годината, ќе бидат многу задоволни.
„Тоа е во интерес на целата економија“, вели Мизо.
