Македонија има ниско ниво на дигитална писменост и потребни се инвестиции за да се сменат состојбите, бидејќи светските трендови налагаат дека без дигитална писменост во модерниот свет младите тешко ќе можат да се снајдат.
„Официјалните податоци на Евростат покажуваат дека само 32 отсто од македонското население имаат барем основно или средно ниво на дигитални вештини, а тој процент во ЕУ е 54 отсто“, вели Никица Мојсоска Блажевски, главна извршна директорка на организацијата „Македонија 2025“.
Таа посочува дека она што загрижува е дека истото тоа се однесува и кај младите.
„Имаме погрешна перцепција дека младите постојано се на социјални медиуми и сметаме дека се дигитално писмени. Меѓутоа, дигиталната писменост се мери на друг начин. Дали знаете да испратите документ преку мејл, дали знаете да се заштитите во интернет-просторот и слично“, појаснува Мојсоска Блажевски. Таа додава дека не треба да се анализира само Скопје туку дали младите што живеат во помали градови и рурални средини имаат можност да учат и да се стекнат со дигитални вештини.
Мојсоска Блажевски посочува дека државата треба да има една голема улога да се поттикне развојот на дигитални вештини преку образованието односно формалното образование.
„Младите во иднина за да најдат работа ќе мора да ги познаваат вештините на високата технологија. Но тие вештини ќе им бидат потребни и приватно. На пример, за да ги користат услугите на електронското банкарство, ќе треба да поседуваат вештини“, вели Мојсоска Блажевски.
Годинава повеќе од 65 отсто од младите се запишаа во стручното образование, за разлика од претходните години, кога интересот за стручните училишта беше помал.
„Идејата на стручното образование е директно да креира работна сила што веднаш ќе биде вработена. Но главната забелешка на работодавците е дека младите не се стекнуваат со потребните вештини и квалификации во средното стручно образование и главен проблем е што тие немаат можност да работат практично. Во таа насока, сега имаме посебен напредок во дуалното образование и тоа е главното што може да го направат компаниите“, вели Мојсоска Блажевски.
Владата најави законски измени што ќе овозможат подолг престој на дигитални номади. Идејата е добра според Мојсоска Блажевски, но таа посочува дека реализацијата треба да биде забрзана.
„Ми се допаѓа иницијативата на Владата за дигитални номади, но како да нема напредок. Стигнуваме до едно ниво и потоа не ги промовираме доволно работите“, вели Мојсоска Блажевски.
Таа додава дека во Македонија може да има една поволна клима, каде што не само што македонските граѓани би работеле во дигиталниот свет туку би можеле да привлечеме и дигитални номади однадвор.