„EarthCare.ai“ е платформа која има цел на едно место да обезбеди пристап до климатски податоци за секој дел од земјината топка. Платформата ќе содржи информации за 50 различни климатски состојби вели еден од нејзините креатори Горјан Јовановски, кој зборуваше за „Блумберг Адрија“.
„Податоците за климатските состојби, може да бидат од корист за бизнисите во насока на носење многу подобри одлуки кога станува збор за отпорноста кон климатската криза во која што се наоѓаме, вели Јовановски.
Тој посочува дека нивната претходна апликација „АirCare“, се фокусираше само на мерење на аерозагадувањето, што е буквално еден тип на податок, за разлика од новата која нуди информации за 50 климатски состојби.
„Има сателити што мерат, државни агенции што мерат, волонтерски сензори. Користењето на сите тие податоци е многу тешко бидејќи имате толку многу извори и формати што треба да потрошите голем дел од времето, но и средства само да ги приберете податоците пред воопшто да ги анализирате“, вели Јовановски.
Тој додава дека токму тоа било нивниот поттик да ја креираат новата платформа наречена „EarthCare.ai“.
„Со оваа платформа ќе може да ги прибереме податоците од сите извори, да ги унифицираме во еден главен формат, да ги нормализираме за да можат да бидат споредливи и понатаму да ги приложиме за да можат бизниси да ги користат“, вели Јовановски.
Без примена на вештачката интелегенција многу е тешко да се прават добри предвидувања.
„Користењето на вештачката интелегенција, што сега е достапна и за помали стартапи како нашиот, како и за поголемите корпорации со кои соработуваме, ни дозволуваат да гледаме во иднина, да ги анализираме податоците кога главните извори ги нема“, вели Јовановски.
Тој појаснува дека пред неколку недели сателитите на НАСА, кои ги гледат пожарите на земјата, една недела не работеле поради проблеми во системите. Во тој период, никој не можел да добие податок како изгледа во живо состојбата со пожарите на земјината топка.
„Користејќи ги моделите на вештачката интелегенција можевме да откриеме каде се уште има пожари, користејќи и други метрики, како на пример, какво е аерозагадувањето, светлината, зрачењето, температурата. Овие модели ни помагат да откриеме податоци кои претходно ни беа или тешко достапни или невидливи“, вели Јовановски.
Во однос на апликацијата „EarthCare.ai“ Јовановски посочува дека веќе зборуваат со повеќе индустрии каде истата би нашла примена.
„Со Ауди бевме партнери во една акцелераторска програма во Берлин, каде бевме како тим. Со нив, дискутираме за можноста за приклучување на овие податоци во нивните автомобили, вели Јовановски. Тој појаснува дека тоа би значело, автомобилите да се прилагодуваат на надворешните услови, дали тоа би било аерозагадување, пожари или поплави кои се случуваат во реално време.
За поголем развој на стартап сцената во Македонија, според Јовановски недостасуваа да се привлечат ментори од големите компании од целиот свет.„Да ги привлечеме од големите фирми, не само во Македонија туку и на Балканот, да им го дадат своето знаење на локалните стартапи и ги насочат како тие може да напредуваат понатаму во развивање на сосптвените бизниси, а секако тука е и потребата од поврзување со инвеститори, вели Јовановски.