.webp){kind=icon}
Платите во Македонија не растат правопропорционално со продуктивноста. Во борбата да се задржат вработените, компаниите ги ставаат на тест и својата ликвидност и одржливост на работењето, вели во интервју за „Блумберг Адрија“ претседателката на Организацијата на работодавци, Владанка Трајкоска.
Таа посочува дека во вакви околности на долг рок, растот на платите ќе донесе и поскапи крајни производи.
Блумберг Адрија ТВ
„Ние не добивме попродуктивни работници со тоа што ги зголемивме платите, туку има еден вид натпревар помеѓу компаниите за задржување на вработените, односно преземање на вработените од другите компании. Во последно време она што се забележува е дека на вработените им се нудат и дополнителни бенефиции само за да бидеме поинтересни за нив. Но, ние не добиваме поквалитетни работници, поедуцирани млади луѓе, не добиваме повредни работници, напротив. Се трудиме да го задржиме нивото од претходно, што е многу тешко, што значи дека тука индиректно дејствуваме на ликвидноста на компаниите, на нивната продуктивност како компании. Се надевам дека во иднина ќе се освестиме и ние и работниците и ќе се потрудиме да имаме поголем обем на производство и ќе може да одговориме на пазарите. Сериозно размислуваме дека на подолг рок профитот на компаниите ќе биде целосно наменет за плати на вработените ако сакаме да го одржиме работењето, но газдите, странските компании, имаат интерес само за резултатите од работењето и тука ќе имаме сериозно зголемување на цените на производите, бидејќи платите на вработените влегуваат и во ефектот на производот“, вели Трајкоска.
Инаку, платите во регионот Адрија растат со најбрзо темпо во најмалку една деценија, покажа последната анализа на нашиот аналитички тим за движењата на пазарот на трудот. Меѓу факторите што влијаат на овој тренд се барањата на работниците за раст на платите поради инфлацијата, како и дефицитот од кадар што ја подобрува преговарачката позиција на работниците што останале во земјите. Но македонските плати и натаму се на дното во регионот.
Блумберг Адрија ТВ
„Многу фактори влијаат на ова прашање, знаете дека во Македонија сè уште владее категоријата минимална плата и многу од компаниите ја користат како репер за понатамошно одлучување за висината на платите. Сметам и дека компаниите не се доволно свесни дека дефицитот од кадар допрва ќе биде проблем и дека во иднина ќе мораме да се позанимаваме со реалната висина на платите на вработените и споредбено со регионот. Истовремено, сите фактори што влијаат на инфлацијата, која ја јаде платата, дејствуваат инфлаторно и врз работењето на компаниите. И оттука сметам дека како што влијае на работењето и на успехот на компаниите, така влијае и на висината на платите на вработените. Во иднина ќе мора посериозно да се позанимаваме не само со висината на платите туку и со сигурноста на нивното функционирање во државава“, вели Трајкоска.
Коментирајќи го дефицитот од работна сила, Трајкоска вели дека бизнисот сериозно размислува за увоз на работна сила од странство.
„Мораме да бараме решение и мора да увезуваме работници. Не се виновни само компаниите за губењето на работна сила туку комплетното функционирање на оваа држава, кое ги тера граѓаните да ја напуштат. Нашата идеја е да внесеме луѓе што ќе ја зголемат продуктивноста на компаниите. Нам ни треба едуциран и квалификуван кадар“, вели претседателката на Организацијата на работодавци.
