.webp){kind=icon}
Нема услови Народната банка во Македонија да ја намали релативно рестриктивната политика што ја води сега, вели универзитетскиот професор Никола Поповски во интервју за „Блумберг Адрија“. Тој додава дека македонската инфлација сè уште ротира со околу 10 проценти, со проекција дека до крајот на годината ќе се спушти некаде на осум отсто.
„Сметам дека сега можеби ќе биде проблем да се стигне до првичните проекции дека просечната годишна инфлација ќе се спушти на околу осум отсто. Можеби ќе биде проблем да се стигне и до осум отсто“, вели Поповски.
Тој посочува дека нема услови сегашната релативно рестриктивна монетарна политика на Народната банка да се намали, затоа што инфлацијата е сè уште висока, каматните стапки се некаде од три до четири процентни поени под референтната каматна стапка од 6,15.
„Ако има поместување во политиката на НБРМ, тоа ќе биде мало поместување односно да не се оди со 250 базични поени како што се одеше досега, а последниот пат се отиде со 150 базични поени. Тоа значи дека може да се забави, но никако да се намали“, вели Поповски.
Bloomberg Adria
Дополнително, тој смета дека фискалната политика во овој момент малку придонесува за намалување на инфлацијата.
„Тие се занимаваат со директен интервенционизам, со контрола на цени, и инјектираат висок фискален дефицит од 4-5 отсто. Најстрашно, наместо да ги инјектираат во инвестиции, во таква јавна потрошувачка, тие ги пренаменуваат за плати, пензии, за социјална заштита“, вели Поповски.
Тој додава и дека привремените замрзнувања на цените ќе мора да се повлечат во еден момент и дека сите овие показатели не даваат можност за намалување на рестриктивната политика на НБРМ.
Поповски смета дека инфлацијата во ЕУ и Америка е намалена и врз основа на тоа ФЕД сега ќе почне полека да го запира растот на каматните стапки или ќе има многу мало поместување.
Сериозна рецесија во градежништвото
Во однос на забавувањето на македонската економија, Поповски посочува дека просекот за двата квартала е 1,5 отсто раст на БДП, што е објективно во вакви околности. Од една страна е добро што не сме во стагнација или рецесија, но од друга е далеку од тоа што го очекуваме.
„Градежништвото имаше двоцифрен раст во првиот квартал, а во вториот квартал има 22 отсто негативен раст, што е исклучително многу. Тоа упатува на сериозна рецесија во градежништвото“, вели Поповски.
Тој додава дека второ што е важно е дека градежништвото во Македонија сè уште многу зависи од државниот интервенционизам, од бавните дозволи за градење, од мораториумите што ги прогласуваат општините, но и од градежните дејности на државата.
„Сега започнува изградбата на автопатиштата што ги гради ’Бехтел и Енка’ од 1,3 милијарда евра. Може ќе чинат и повеќе. Но тие веќе во третиот и четвртиот квартал од следната година ќе доведат до тоа да има страшен раст во градежништвото, а кога ќе заврши ќе има страшен пад, бидејќи ќе биде невозможно да се дополни тој раст“, вели Поповски.
Тој посочува дека сериозен проблем е што во едни сектори постојано имаме позитивни, а во други негативни движења и што не може да се придвижи целата економија.
