Во првите седум месеци од оваа година има драстично зголемување на продажбите на автомобили во Европа. Станува збор за раст на продажбите од околу 18 отсто споредено со минатата година, вели Виктор Мизо, генерален директор на „Костал Македонија“, во интервју за „Блумберг Адрија“.
„Но мора да се земе предвид дека минатата година имаше многу драстичен пад, најмало производство и продажба во повеќе од една деценија. И сега, иако тоа зголемување е многу поголемо од лани, сепак имаме речиси 25 отсто помалку продадени возила споредено со преткризната 2019 година“, вели Мизо.
Очекувањата се дека во втората половина од годинава ќе имаме едно забавување на растот, така што на крајот на оваа година се очекува дека ќе има некаде 11 отсто повеќе возила продадени споредено со лани.
„Тука пред сè влијаат сите оние економски случувања, не само во Германија, која знаеме дека е во техничка рецесија, туку и зголемените камати, зголемените трошоци за производство на возилата“, вели Мизо.
Дополнително, Мизо смета дека влијаат и сите несигурности околу процесот на електрификација бидејќи кај електричните возила има голем наплив пред сè на кинески производители на возила во Европа.
Кога може да се очекува враќање на продажбата на ниво од 2019 година?
Враќањето на продажбата и производството на автомобилите на ниво од 2019 година нема да биде скоро.
„Мислам дека ќе почекаме уште седум-осум години најмалку. За жал, она што се случуваше во 2019 година, според последните анализи што ги гледаме и како компанија, мислам дека тоа пред 2029 и 2030 година нема да се случи пред сè на европско ниво“, вели Мизо.
Мизо додава дека на глобално ниво многу зависи од тоа како ќе расте Кина, што ќе се случи на северноамериканскиот пазар и во Југоисточна Азија, но смета дека во Европа ќе биде минимум крајот на оваа декада додека да се стигне до продажба на 14,5-15 милиони возила што беа продадени во 2019 година.
Продажба на електрични возила
Интересна информација дојде од Европската комисија, дека во следните 13 месеци ќе се анализира дали Кина дава премногу субвенции за производство на електричните автомобили и на тој начин ги прави кинеските производители на возила многу поконкурентни и да може да продаваат на европскиот пазар. Во овој случај Европската комисија размислува за зголемување на царините.
Кина, пак, вели дека конкурентноста не е само поради субвенциите туку и поради конкурентните синџири на снабдување. Тука не станува збор само за производството на литиум туку и сите материјали што се потреби за производство на батерии и ефикасност на склопување на возилата ги прават поконкурентни кинеските во однос на европските.
„Проблемот што може да настане е на кој начин Кина би се спротивставила на евентуалното европско воведување за зголемени царини“, вели Мизо.
Тој додава дека во САД, царините за овие кинески возила се 27,5 отсто, а во Европа се 10 отсто.
„Годинава осум отсто од сите електрични возила на европскиот пазар ќе дојдат од Кина, а до крајот на декадата ќе биде15 отсто“, вели Мизо.
Тој посочува дека треба да има подобри начини од царинските бариери за зголемување на конкурентноста на европските производители, бидејќи најголем проблем ќе имаат германските производители, кои најголемиот дел од својот профит го креираат на кинескиот пазар
„Ако навлеземе во царинска војна меѓу ЕУ и Кина, никој нема да биде победник“, заклучува Мизо.
.webp){kind=icon}
