Во вториот квартал од годинава јавниот долг на Македонија изнесува 8,3 милијарди евра, што е 57,9 отсто од БДП. Државата продолжува со задолжувањата на домашен терен, а министерот за финансии Фатмир Бесими во интервју за „Блумберг Адрија“ вели дека до крајот на годината јавниот долг ќе биде околу 61 процент од БДП, во зависност од тоа како ќе се заокружи процесот на задолжување.
Министерството за финансии сега најави издавање на зелена обврзница, за која аукцијата ќе биде на 3 октомври.
„Износот ќе биде на 10 милиони евра, двегодишна, со 4,7 отсто годишна камата, а ќе можат да се пријават банки, институции и граѓани. Очекуваме поголем интерес, пред сè од банките и институциите, затоа што станува збор за еден нов инструмент што во билансот на банките и компаниите им значи дополнителна вредност, не само финансиска вредност“, вели Бесими во интервјуто за „Блумберг Адрија“.
Тој посочува дека парите ќе одат во фондот за енергетска ефикасност, во Развојната банка.
„Ќе поддржиме финансирање на зелени проекти односно енергетски ефикасни проекти и обновливи извори на енергија за мали и средни претпријатија, каде што со поволни услови ќе може да им се помогне на нашите компании за ваквите проекти“, вели Бесими.
Новата граѓанска обврзница ќе биде на 10 милиони евра
Министерството за финансии ќе издаде уште една граѓанска обврзница.
„Планираме да ја издадеме во текот на октомври. Ќе биде на 10 милиони евра во денарска противвредност. Но ќе се прифати целата понуда колку што ќе покажат граѓаните. Таа ќе биде со 5 отсто камата. Станува збор за двегодишна обврзница, која ќе се обновува. Значи и во иднина тие ќе постојат на пазарот, граѓански обврзници ќе има во континуитет во нашите финансиски пазари“, вели Бесими.
Тетово доби структурна обврзница од 4,5 милиони евра
Министерството за финансии издава структурни обврзници за општините, кои се десетгодишни. За добивање структурна обврзница се пријавиле четири општини за долгови направени до крајот на септември 2021 година. Кичево во последен момент се откажало од ваква обврзница, бидејќи успеало да ги врата долговите. Општина Тетово добила структурна обврзница со износ од 4,5 милиони евра, Желино во износ од еден милион евра, а Виница со нешто помал износ.
„Владата одлучи да им се издаде структурна обврзница на овие три општини и тие во следните десет години ќе враќаат по една десеттина од долгот“, вели министерот Бесими.
Тој појаснува дека операторите на кои овие општината им должат ќе добијат обврзница во износот во кој им должи општината и со тие обврзници ќе може да ги тргуваат на секундарен пазар, да ги претворат во ликвидност или да платат јавни давачки.