.webp){kind=icon}
Зелената обврзница што за првпат ја издава Македонија во износ од 10 милиони евра, а чија аукција ќе се одржи утре, е добар исчекор кон придвижување на економијата кон зелената транзиција, вели во интервју за „Блумберг Адрија“ професорот Абил Бауш.
Обврзницата е со каматна стапка од 4,75 отсто и рок на достасување од две години, а парите ќе одат во Фондот за енергетска ефикасност, во Развојната банка, преку кој ќе се поддржат зелени проекти односно енергетски ефикасни проекти и проекти во обновливи извори на енергија за мали и средни претпријатија.
Bloomberg Adria
„Прво, морам да признаам дека ние поставуваме нова обврзница на пазарот, тоа е нешто ново во финансискиот капитал што би привлекувало средства за државните трошења, а второ – донекаде се става акцент на зелената политика, зелениот економски раст, односно на политиките што се тренд во ЕУ, а кај нас некако назадуваат. Во овие моменти, иако износот е многу мал, би рекол и симболичен, она што мене ми дава оптимистички пристап кон тоа е што овие средства ќе се користат за проекти што ќе се базираат на принципот на економски раст, проекти што водат кон циркуларна економија, зелена економија итн. Од една страна се прави еден вид собирање средства од државата, која ја става во стратегијата зелената економија, а од друга страна ја крева свеста кај граѓаните дека е време да се инвестира во нови можности на економијата, кои би ја воделе државата кон некаков економски раст и развој“, вели Бауш.
Тој потенцира дека Македонија има голем потенцијал за придобивки и раст на државните приходи преку инвестиции во зелени политики, како на пример циркуларната економија. Сепак, вели тој, свеста е мала и потребно е повеќе да се работи на ова поле.
Bloomberg Adria
„За жал, нашата економија е кревка и овој иновативен пристап кон зелената економија е мал. Додека пак, во однос можностите, според наши анализи, се покажува дека државата има потенцијал да генерира до 200 милиони евра годишна од циркуларната економија на пример, зелената економија и енергетската ефикасност. Но, за жал, кај нас сè уште се инвестира само кон енергетска ефикасност, без да се земат предвид и други можности. Потенцијалот на стопанството е огромен, добро е што почнуваме да мислиме на конкретни зелени инвестиции, но сè уште е потребна работа – треба да се насочиме кон инвестиции за третман на отпад, рециклирање, развој на циркуларната економија итн.“, вели Бауш.
Во однос на граѓанската обврзница, пак, според Бауш, недостига транспарентност за што ќе се користат тие пари.
„Овој инструмент е добредојден во ситуација на висока инфлација. Дури и граѓаните имаат опција да инвестираат во сигурни извори. Но, од друга страна, тоа што не ми се допаѓа кај овие обврзници е начинот на кој се инвестира со тие пари. Нема канализираност на инвестициите како што има кај зелената обврзница“, вели Бауш.
