.webp){kind=icon}
Делницата од Подмоље до Охрид, на која се работи во почетокот на туристичката сезона, а туристите се пренасочуваат преку стариот пат, треба да биде во функција на 10 јули, вели во интервју за „Блумберг Адрија“ Благој Бочварски, министер за транспорт и врски.
„Во однос на изградбата на автопатот Кичево - Охрид, особено делницата од Подмоље до Охрид, во моментот се одвиваат силни градежни зафати, со сериозна механизација на теренот, за да го приспособиме овој автопат и што поскоро да биде ставен во функција“, вели Бочварски и додава дека ова е многу важно токму поради туризмот во Охрид.
Според него, во моментот се работи со засилено темпо и овој автопат мора да се заврши.
„Очекувањата се на оваа делница од Подмоље до Охрид сите градежни работи да бидат завршени до 10 јули, со што ќе биде ставен во функција најпрвин од едната страна од автопатот, за потоа да се пристапи кон целата техничка документација за подготовка на сообраќајниот режим за пуштање во употреба и на другата страна, односно да се комплетира автопатската делница“, вели Бочварски.
Годинава се очекува да има најголем број превезени патници во авиосообраќајот, односно бројот од 2,7 милиони патници што беше рекорд во 2019 година, сега се очекува да биде околу три милиони превезени патници.
„Имаме околу 50 дестинации што оперираат од двата аеродрома од Скопје и Охрид, а сега ќе сообраќа и нова линија од Охрид до Белград, што е показател дека работиме и на развој на туризмот, но и на авиосообраќајот,“ вели Бочварски.
Во однос на третата делница на пругата кон Бугарија, се прават сите подготвителни работи за распишување тендерска документација и тендерска постапка за избор на изведувач, што е и најобемно. Изведувањето на третата делница, која е најскапа, чини 400 милиони евра.
„Ја завршивме и пругата од Битола до Кременица, што значи го комплетиравме и овој дел од коридорот 10Д на железничката пруга меѓу Северна Македонија и Грција“, вели Бочварски.
