Минатата година авиосообраќајот во Македонија забележа голем раст и закрепнување по пандемијата, а трендот продолжува и годинава. Според податоците на Министерството за транспорт и врски, во јануари годинава споредено со истиот месец лани има раст на бројот на патници за 47 отсто.
„Очекувањата се дека доколку продолжи овој тренд на раст на бројот на патници, ќе ја надминеме и 2023 година и тој број од три милиони патници ќе биде зголемен дополнително. Нашите очекувања се дека само на скопскиот аеродром ќе го надминеме бројот од три милиони патници годинава“, вели Благој Бочварски во интервју за „Блумберг Адрија“.
Во 2023 година веќе почувствувавме огромен раст на авиосообраќајот и она што се реализираше како број на превезени патници ги надмина очекувањата и на Владата.
„Очекувањата по пандемијата на ковид беа дека авиосообраќајот генерално во Европа ќе се врати во нормала, на нивото од 2019 година, дури во 2024 или 2025 година. Но она што го видовме е дека веќе минатата година, не само што стигнавме до таа бројка на превезени патници од 2,7 милиони што беа превезени во 2019 година туку ја надминавме за некаде 450 илјади патници во текот на 2023 година, вели Бочварски.
Бочварски посочи дека тоа покажува дека авиосообраќајот се врати во нормално функционирање.
„Ги надмина сите очекувања од независноста на Македонија до денес. Ова беше најголемиот број на превезени патници споредбено со која било година. Она што дополнително ни дава мотив и позитивни аргументи да веруваме во дополнителен раст на авиосообраќајот и годинава е фактот што минатата година РС Македонија имаше втор најголем раст по бројот на превезени патници во Европа, од 64,9 отсто, што значи уште еден добар и позитивен показател за враќањето на авиосообраќајот во една нормала и пробивање на сите оние позитивни бројки што ги имавме во минатото“, вели Бочварски.
Минатата година се реализираа и нови авиолинии.
„Сплит се поврза со Скопје, исто така тоа покажа дека е добро да се соработува и да се отворат повеќе врати за туризам, за соработка на економски план. Скопје се поврза со Сараево исто така преку авиолинија по долги години, што значи дека овој регион има можност за повеќе соработка и секако очекувам дека годинава ќе продолжи тој тренд“ , истакна Бочварски.
Преговори за нови дестинации
Од „ТАВ Македонија“ посочуваат дека работат на отворање нови дестинации.
„Во преговори сме за нови дестинации. Во следниот период ќе имаме отворање нова дестинација кон Рига, а во преговори сме и со други авиокомпании за нови линии, но сè уште рано да се каже“, вели Владимир Граматиков, директор за приходи и развој во „ТАВ Македонија“.
Тој додава дека секогаш во фокус, покрај Скопје, е и охридскиот аеродром.
„Работиме на носење нови туроператори и нови чартер-линии, но секако и редовни линии што ќе нè поврзат преку целата година. Интензивно работиме да се поврзе Охрид со Турција, но какви ќе бидат плановите сè уште не може да се каже“, вели Граматиков.
Сепак, договарањето нови авиолинии е еден тежок процес, кој некогаш може да трае и четири години.
„Најчесто поставувано прашања е зошто немаме летови за Шпанија. За Шпанците не сме традиционален пазар и многу е тешко една авиокомпанија да убедиме да почне да лета за Македонија од Шпанија“, вели Граматиков.
Тој посочува дека во отворањето нови авиолинии се вклучува целиот туристички сектор, се вклучуваат туроператори, бизнис-секторот, а некогаш и локални самоуправи. Тој додава дека многу често се вклучуваме и амбасадите во целиот тој процес за да се убедат авиокомпаниите да летаат.
Граматиков истакнува дека досега добро ни оди, но мора да сфатиме дека конкуренција се аеродромите во цела Европа и кога една авиокомпанија ќе добие нов авион, стотици аеродроми тргнуваат во поход да ги убедат да воспостават авиолинија, а секако успева оној што ќе докаже дека има најголем потенцијал.