Нови сезонски авиолинии ќе го збогатат портфолиото на скопскиот аеродром. Очекувањата се дека бројот на патници од двата аеродрома годинава ќе надмине 3,3 милиони, а со летниот план на летање од скопскиот аеродром ќе има 59 дестинации.
„Имаме интересни новитети за нашиот пазар. Нови авиолинии и тоа до Крф и до Рига. Крф ќе биде редовна линија, така што нашите патници слободно може сами да си го организираат патувањето и да си купат карти. Рига е интересен пазар, комплетно нов за нас како туристичка понуда“, вели Владимир Граматиков, директор за приходи и развој во „ТАВ Македонија“.
Тој додава дека „ТАВ Македонија“ постојано е во комуникација и со други авиокомпании.
„Напорно работиме за отворање нова линија со Шпанија, но и кон другите европски градови. Секако, се обидуваме да ги вратиме и линиите кон Блискиот Исток, да ги вратиме линиите кон Дубаи. Преговорите се тешки, напорни, но даваме сè од себе за да ги реализираме“, додава Граматиков.
Годинава во „ТАВ Македонија“ очекуваат рекордна година во однос на бројот на патници, кој се очекува да надмине 3,3 милиони, а само од скопскиот аеродром да полетаат и слетаат три милиони патници.
Секако, според Граматиков, еднакво се работи и на развој на охридскиот аеродром, а една од клучните цели е негово поврзување со Турција.
„Интерес постои и се водат преговори. Преговараме и за повеќе дестинации во Турција, но останува да видиме што ќе потврдат авиокомпаниите, сепак тие го имаат последниот збор“, вели Граматиков.
Тој додава дека охридскиот аеродром годинава ќе биде поврзан со Белград.
„Повторно се враќа ’Ер Србија’ со летови до Белград, четири пати неделно. За разлика од лани, годинава оваа авиолинија ќе почне порано и ќе заврши подоцна. Ова е интересна дестинација затоа што не е чартер-линија туку дава можност за нашите граѓани преку Белград да се поврзат со другите дестинации, но исто така овозможува и преку Белград повеќе луѓе од регионот да дојдат во Охрид“, вели Граматиков.