.webp){kind=icon}
За шест месеци преку меѓународниот аеродром во Скопје и аеродромот „Св. Апостол Павле“ во Охрид во првата половина од годинава се превезени 1.338.406 патници, што претставува годишен пораст од 41 процент, соопшти денеска концесионерот на аеродромите „ТАВ Македонија“. Споредено со 2019 година, која се смета за година на авијацијата, бидејќи беше најсилна година од аспект на патничкиот сообраќај пред да се случи кризата со пандемијата, „ТАВ Македонија“ има 15 проценти повеќе патници во првата половина од оваа година.
Во однос на бројот на летови за истиот период, двата македонски аеродрома имаат пораст од 23 проценти, или вкупно 10.299 опслужени летови од јануари до јуни 2023 година.
„Со оглед на тоа што летната сезона е во полн ек и со сумираните бројки за авиосообраќајот за првата половина на 2023 година, или за периодот јануари – јуни, како ТАВ со задоволство забележуваме силен позитивен тренд на закрепнување и зголемување на бројките на патници. Ваквиот пораст на бројот на патници е доказ и резултат на нашата посветеност, ангажираност и ориентираност кон резултати и кон нашите клиенти и доброто управување“, изјави Неџат Курт, генерален директор на „ТАВ Македонија“.
„ТАВ Македонија“
Новите авиолинии и новите авиокомпании што влегоа на македонскиот авијациски пазар во изминатите неколку месеци, покрај редовните авиолинии што сообраќаат преку целата година и традиционалните летни сезонски и чартер-летови, претставуваат уште еден дополнителен придонес за континуирано зголемените резултати, сметаат од ТАВ.
Најфреквентни дестинации од меѓународниот аеродром во Скопје, според статистиката за патничкиот авиосообраќај на „ТАВ Македонија“, за првата половина од 2023 година, јануари – јуни, се Истанбул (двата аеродрома ИГА и „Сабиха Гокчен“ со 11,4 проценти пазарен удел), Базел Милуз (6,7 проценти), Цирих (5,9 проценти), Дортмунд (4,9 проценти), Виена (4,6 проценти), потоа следуваат Минхен Меминген (4,3 проценти), Франкфурт (3,5 проценти), Малме (2,9 проценти) и Келн (2,6 проценти).
Топ пет земји со директни летови за периодот јануари – јуни 2023 година биле Германија, Швајцарија, Турција, Италија и Шведска.
На охридскиот аеродром, во првата половина од 2023 година, најфреквентна дестинација за патување била Базел (23,7 проценти удел), потоа Виена (22,6 проценти), Дортмунд (17,9 проценти), Меминген (11,8 проценти), Малме (8,6 проценти), Цирих (8,4 проценти) и Амстердам (6,1 процент), а преостанатите дестинации имаат 0,2 процента пазарен удел.
Моментално, во согласност со летниот ред на летање, од меѓународниот аеродром во Скопје летаат 21 авиокомпанија до 47 дестинации, додека од аеродромот „Св. Апостол Павле“ во Охрид летаат шест авиокомпании до 12 дестинации
