.webp){kind=icon}
Министерството за финансии и Министерството за животна средина и просторно планирање обезбедуваат 50 милиони евра директна финансиска поддршка за општините за реализација на проекти за подобрување на водната инфраструктура. Договорите за реализација на овој проект денеска беа потпишани од страна на министерот за финансии Фатмир Бесими, потпретседателката на ЕИБ, Лилјана Павлова, и министерот за животна средина и просторно планирање Насер Нуредини, во присуство на евроамбасадорот Дејвид Гир.
Средствата ќе бидат искористени за рехабилитација, модернизација и проширување на инфраструктурата за водоснабдување, за собирање и третман на отпадни води, системи за атмосферска канализација и итни мерки за заштита од поплави, како и набавка на специјализирана опрема за одржување.
„Условите под кои ќе ѝ биде доделен заемот на земјава се исклучително поволни. Рокот за отплата изнесува до 25 години, со вклучен грејс-период до пет години. ЕИБ е значаен партнер на РС Македонија во реализација на приоритетните проекти во областа на енергетиката, инфраструктурното поврзување, зелената транзиција, како и во зголемување на конкурентноста на домашните компании“, велат од Министерството за финансии.
Министерот Бесими на потпишувањето на договорите истакна дека овој договор, кој е потврда за континуираната поддршка на ЕИБ на земјава, обезбедува нови 50 милиони евра директна финансиска поддршка на Владата, која ќе се дистрибуира до општините како донација за реализација на проекти од комуналната инфраструктура.
„Овој проект е дел од политиките на Владата за рамномерен регионален развој и се очекува преку инвестиции во комуналната инфраструктура да се стимулира развојот на општините во земјата“, рече Бесими.
Потпретседателката на ЕИБ потенцира дека ова е стратегиска инвестиција за земјата со поддршка на европскиот тим и е приоритет за обезбедување подобри услови за живот на граѓаните, како и за патот кон ЕУ и усогласувањето со европските стандарди. Ќе помогне, како што потенцира Павлова, да се обезбедат финансиски средства за секторот за водоводна инфраструктура и да им обезбеди на нашите локални партнери долгорочен финансиски извор за да ги комплетираат нивните потреби и одржливи цели.
Средствата обезбедени со оваа кредитна линија ќе бидат имплементирани преку Министерството за животна средина и просторно планирање.
„Ние веќе пристапивме кон идентификување на потребите на локалните самоуправи и очекуваме дека тие ќе покажат зрелост и ќе имаат достаточен капацитет да ја обезбедат потребната проектна документација за да имаме брза и успешна имплементација, од која, пак, ќе зависи повлекувањето нови достапни инвестиции. Обезбедување чиста вода за пиење за сите жители е еден од врвните приоритети на патот кон Европската Унија“, истакна министерот Нуредини.
Од 1991 година досега ЕИБ ја има поддржано нашата економија со над една милијарда евра инвестиции во клучни инфраструктурни проекти, како и за поддршка на мали и средни компании, а во моментов нејзината поддршка во проекти во јавниот сектор е околу 200 милиони евра.
