.webp){kind=icon}
„Јагео“ ќе отвори две фабрики во Македонија
Тајванската компанија „Јагео“ и официјално влегува во Македонија. Вчера беше потпишан договорот за инвестицијата, вредна 205 милиони евра, која треба да отвори околу 4.000 нови работни места. „Јагео" ќе произведува резервни делови и компоненти за автомобилската индустрија и за зелена енергија.
Изградбата ќе почне во јули, а производствени погони ќе има во ТИРЗ Скопје 1 и во ТИРЗ Штип. Преговорите за инвестицијата траеле речиси една година, а земјава е избрана како најдобра во „трката“ со другите од регионот и пошироко.
Брзата пруга ќе стигне до Ниш - во земјава Вардар е пречка
За пет години, возовите од Ниш до Љубљана ќе се движат со брзина од 200 километри на час. Србија, Хрватска и Словенија влегуваат во сериозна инвестициска активност за реконструкција на пругите по должината на паневропскиот коридор 10. Овој коридор се протега од Австрија, преку Словенија, Хрватска, Србија, Македонија, до Грција. Вкупната инвестиција во трите земји се проценува на 1,7 милијарда евра.
Во Грција, од Солун до Атина има две брзи пруги. Ова значи дека за коридорот 10 да биде целосно модернизиран, недостига уште делот од пругата од Ниш до Солун, или целиот коридор во Македонија.
Директорот на јавното претпријатие „Железници на Република Северна Македонија - инфраструктура“, Хари Локвенец, во изјава за „Блумберг Адрија“ вели дека главна пречка за модернизација на македонските пруги е конфигурацијата на теренот.
На берзите...
Индексите на светските берзи се главно во негатива, а тие што забележаа добивка се во зоната на сосема мал плус. Причината е што трговците ги одмеруваа приходите од Волстрит. Имено, индексот S&P 500 порасна само за 0,1 отсто, додека технолошкиот индекс речиси не се промени. Во Азија берзанските индекси се тргуваат со загуба до најмногу 0,5 отсто.
Нафтата беше стабилна додека инвеститорите ги одмеруваа знаците за намалување на резервите од сурова нафта во САД наспроти загриженоста за нерамномерното закрепнување на побарувачката и изгледите за натамошно затегнување на монетарната политика. ВТИ за испорака во мај се тргува по цена од 80,78 долари за барел, додека нафтата брент за испорака во јуни чини 84,66 долари.
Еврото е стабилно и во однос на зелената валута се тргува по курс од 1,0973 американски долари за едно евро. Златото загуби 0,1 отсто од својата вредност, со што унца чини 2.003,01 долар.
Ништо различна не е ниту ситуацијата на криптопазарот. Биткоинот загуби 0,7 отсто од вредноста и се тргува по цена од 30.199,84 долари, додека етерот падна за 0,3 проценти, на 2.086,57 долари.
Денеска читајте...
Во последниот период е двоцифрен растот на трошоците за труд по единица производ. Според позитивната законска легислатива, на нето-платата се додаваат неколку ставки на трошоци за работниците, кои го сочинуваат крајниот износ, односно бруто-платата што компанијата ја исплаќа за секој вработен. Сите тие заедно сочинуваат 38 проценти од бруто-платата што отпаѓаат на трошоци за вработените, а според тоа нето-платата што ја добива работникот изнесува 62 отсто од вкупниот износ исплатен од страна на работодавецот, и тоа само за задолжителните трошоци.
Вака поставените ставки за придонеси, даноци и осигурување на вработените воопшто не се наивен трошок за работодавците. Имено, разликата меѓу нето и бруто-минималната плата е нешто повеќе од 9.500 денари. Или, за да се исплати минимална плата од 20.175 денари, работодавецот всушност плаќа 29.739 денари.
Павлова: Сè поскапи кредити, но одржливите инвестиции не смеат да запрат
Ќе се заострат условите за кредитирање, особено во однос на долгорочните или поризични позиции, меѓу кои финансирањето иновации и нематеријални добра, вели Лилјана Павлова, заменик-претседателка на Европската инвестициска банка (ЕИБ).
Последователните шокови во последниве години може да ги принудат владите да одложат некои клучни јавни инвестиции во областите на иновациите, енергијата, дигитализацијата. Но таквите инвестиции ЕИБ ги смета за најважни за да се овозможи зелената трансформација и особено затоа што тие се главните двигатели на економскиот раст на долг рок, заедно со образованието. Затоа, Павлова вели дека ваквите инвестиции не треба да се одложуваат.
