.webp){kind=icon}
Регионалната соработка меѓу компаниите и бизнис-ангелите е клучна за земјите од Балканот да можат да бидат конкурентни со другите глобални компании, вели меѓу другото во интервју за „Блумберг Адрија“ Ардијан Хоџа од форумот „Кеиретсу“ (Keiretsu Forum) - глобална мрежа на бизнис-ангели и VC-инвестиции.
„Ние сме една платформа што ги обединува и инвеститорите и стартапите. Екосистемите во светот се многу поголеми од нашите тука, бидејќи на Балканот сите држави се многу мали за да има голем број компании и инвеститори. Инвеститорите, пак, немаат време за губење и полека-полека престанаа и да се организираат и здружуваат во овој дел од регионот. Затоа е неопходно регионално обединување за стартапите да можат да растат и да бидат конкурентни со глобалните компании... Мислам дека во денешно време најмал проблем се парите. Во нашата мрежа имаме и банки што издвојуваат кредити за инвестиции за стартапи итн. Важно е да има компании што се подготвени и кои имаат веќе тестирана идеја и иновативен продукт“, вели претседателот на Одделот во Југоисточна Европа на форумот „Кеиретсу“ .
Хоџа вели дека бизнис-ангелите имаат интерес за инвестиции во регионот, а како најбрзорастечка сфера во стартап-секторот ги истакнува финтек-компаниите.
„Најмногу се инвестира во финтек-секторот, но има и разни компании што имаат потенцијал за развој. Доброто е што ние како инвеститори не само што гледаме можности да инвестираме туку гледајќи ги презентациите учиме цело време од нив и сме во тек со новите трендови“, вели тој.
Но како економската криза влијаеше врз расположението за инвестиции кај бизнис-ангелите? Хоџа, смета дека токму сега е време за инвестиции во иновации.
„За инвеститорите нема лошо или добро време, особено во време на криза повеќе инвестираат, бидејќи секогаш во време на криза цените, вредноста на компаниите паѓаат и тоа е уште еден плус за инвеститорите. Денес светот има над осум милијарди луѓе, а од кај нас може да се инвестира секаде и стартапите може да продаваат низ целиот свет. Мислам дека ова е најдоброто време и за стартап-компаниите и за инвеститорите и мислам дека и кај нас може да има компании што ќе растат и ќе бидат глобални компании. Во нашиот регион веќе има девет компании што се уникорн, што значи дека вредноста им е над милијарда долари, а има уште 11 што се на тој пат и за многу кратко време и тие ќе станат уникорн и како регион ќе имаме над 20 компании вредни повеќе од милијарда долари“, вели Хоџа.
