Членството на Западен Балкан во ЕУ пред сè е политички, безбедносен и економски интерес на Унијата и нејзините партнери, односно интегрирањето на Западен Балкан е геостратегиска инвестиција во мирна, стабилна, силна и обединета Европа, смета Нина Мојсова Ќосева од здружението „Балкански економски форум“.
Во интервју за „Блумберг Адрија“ таа нагласи дека следната фаза од регионалната економска интеграција треба да се спроведе како дел од многу поголем напор за подлабока економска интеграција на Западен Балкан од ЕУ.
„Клучните елементи што би демонстрирале поголема посветеност на ЕУ кон земјите од Западен Балкан би биле правилно поставување на приоритетите на регионалната интеграција. Мора да бидеме свесни дека регионалната интеграција не е замена за членството на ЕУ, туку е конзистентен дел од напорите и политиките за членството во ЕУ на земјите од Балканот“, додава Ќосева.
Понатаму, потребно е спојување на иницијативата Отворен Балкан и Берлинскиот процес.
„Сметам дека постојат многу регионални иницијативи што треба да се рационализираат во една структура на регионална интеграција, која исто така ќе ги вклучува и земјите членки на ЕУ и ќе му даде една институционална сила на главното регионално тело, а тоа е Советот за регионална соработка“, додава Ќосева.
Таа посочува дека важен момент е вклучување на земјите од Западен Балкан во буџетот на ЕУ.
„Земјите од Западен Балкан треба да бидат вклучени во буџетот на ЕУ, се разбира со почитување на вообичаената условеност со која се соочуваат постојните членки“, смета Ќосева.
Таа додава дека, според анализи на Виенскиот институт за меѓународни економски студии, зголемувањето на буџетските трансфери на ЕУ од сегашниот еден отсто од БДП годишно на два отсто може да го зголеми бруто-домашниот производ на Западен Балкан на 14 отсто. Секако, како што вели Ќосева, потребно е и дополнително интегрирање на земјите од Западен Балкан во единствениот пазар на ЕУ преку проширување и продлабочување на договорите за стабилизација и асоцијација.