Сагата со „Опен еј-ај“ (OpenAI) го доби својот епилог - враќање на Сем Алтман на чело на компанијата и нов одбор на директори. Меѓутоа, кога се спушти прашината, зад неа останаа три прашања и неизвесната судбина на најбараниот тим за вештачка интелигенција во светот.
Накратко - хаосот започна во петокот, на 17 ноември, кога Управниот одбор го смени извршниот директор Алтман без претходна најава. Помалку од два дена подоцна му беше понудена нова работа како шеф за вештачка интелигенција во „Мајкрософт“, најголемиот инвеститор на „Опен еј-ај“. До понеделникот, вработените во „Опен еј-ај“ се заканија дека ќе ја напуштат компанијата доколку Алтман не се врати на работа, а поддршката стигна од лидерите во технолошката индустрија. Помалку од една недела откако беше отпуштен, Алтман беше вратен во компанијата.
„Мислам дека постои голема веројатност Алтман да остане и има неколку причини за тоа. Број еден, 'Мајкрософт' го сака на таа позиција - иако 'Мајкрософт' не е во одборот во моментов, верувам дека ги влече конците. Тоа го видовме минатата недела, кога тие се вклучија за да го направат она што е потребно за да ја спасат компанијата. Исто така, мислам дека вработените сакаат Сем да остане - многумина имаат финансиски улоги во компанијата и го гледаат Алтман како клуч за монетизација“, изјави извршниот директор на „Рисурџ“ (Resurge), Џејсон Голд, за „Блумберг Адрија конект“.
Новиот привремен одбор на „Опен еј-ај“, во кој првично нема да биде Алтман, ќе биде предводен од Брет Тејлор, поранешен коизвршен директор на „Сејлсфорс“ (Salesforce). Меѓу другите директори се Лери Самерс, поранешен министер за финансии на САД, и Адам Д'Анџело, коосновач и извршен директор на „Куора“ (Quora). Некои извори тврдат дека Лорен Пауел Џобс, вдовицата на Стив Џобс, и поранешната извршна директорка на „Јаху“ (Yahoo), Мариса Мајер, како и поранешната државна секретарка Кондолиза Рајс, исто така биле во трка, но нивните имиња биле отфрлени.
Се разбира, новиот одбор го наследува проблемот од кој започна сè - а тоа е прашањето за понатамошната насока на функционирањето на „Опен еј-ај“ како непрофитна организација со еден профитен оддел, чие лице и визија главно ги претставува Сем Алтман. Голд верува дека во иднина „Опен еј-ај“ ќе функционира во согласност со својот најголем финансиер - од кој зависи опстанокот на самата компанија.
„Доколку 'Мајкрософт' не влезеше и не внесеше разум во одборот минатиот викенд, мислам дека компанијата ќе пропаднеше и тоа ќе беше катастрофално сценарио, а 'Мајкрософт' ќе беше во можност да го земе она што ќе останеше од неa, бидејќи се согласија да ги вработат тимот и многу други вработени доколку заминат. Вистинскиот победник овде се вработените во 'Мајкрософт' и 'Опен еј-ај'“, заклучи Голд.
За тоа што се очекува од привремениот управен одбор, како ќе изгледа динамиката во рамките на „Опен еј-ај“, но и дали неконтролираниот развој на вештачката интелигенција може да ги исплаши инвеститорите, подетално во разговорот во видеото.