.webp){kind=icon}
Во новиот пакет антикризни мерки не се земени предвид сугестиите на стопанството, а периодот на времетраењето на мерките личи на предизборен поткуп наместо на реална поддршка, се дел од критиките на бизнис-секторот за новиот пакет мерки што од денеска стапуваат на сила.
„Ако одиме дел по дел од она што е дискутирано, ние бевме на еден состанок каде што дискутиравме во врска со буџетот во 2024 година и ништо слично на ова не беше навестено. Зголемување на платите што треба да се усогласат со закон беше дискутирано. Но, најголем дел од тоа што беше презентирано вчера воопшто не беше споменато, иако сега се дискутира дека овие средства, овие мерки биле планирани во буџетот за 2023 и 2024 година. Во минатото видовме дека ниедна мерка што е донесена без консултација и без прифаќање на сугестиите на засегнатите страни, особено бизнис-секторот, не дава резултати. Не може да не се забележи и дека времетраењето на пакетот на мерки премногу коинцидира со датумот на евентуалните избори. Не случајно има многу критики дека главниот фокус на мерките можеби не е поддршката, туку обезбедување некаква симпатија од засегнатите страни“, вели Сашо Дукоски.
Блумберг Адрија
Тој додава дека сите мерки треба да бидат долгорочни, системски и реформски, критикувајќи и дел од новите законски решенија, како данокот на екстра-профит – средства што се искористија токму за новите антикризни мерки.
„Повеќепати сугерираме дека најмногу треба да се работи на сузбивање на сивата економија, која дефинитивно претставува проблем за општеството. Исто така зборуваме дека особено внимание треба да се обрне на правната сигурност и даночната сигурност. Сведоци сме дека годинава се донесе данок на екстра-добивка, потоа популарно наречен солидарен данок, кој извлече одредени средства од стопанството, иако тие не беа планирани во даночниот календар. Таквите мерки предизвикуваат една даночна несигурност, која влијае на целосното функционирање на економијата“, вели Дукоски.
Според претседателот на Трговската комора, вака креираните мерки може да ја подгреат и инфлацијата.
„Директно субвенционирање, односно директно доделување средства и вештачкото популистичко зголемување на платата што не е базирано на реални основи ќе ја подгрее инфлацијата. Тука мора да ја споменеме и монетарната политика, која е несоодветно агресивна за нашата економија. Ги следиме примерите на економии што се многу попотрошувачки од нашата. Тоа е неодржливо“, вели Дукоски.
