Треба да се видат потрајни ефекти за да се премине кон олабавување на монетарната политика, вели Борче Треновски, универзитетски професор и член на Советот на НБРМ во интервју за „Блумберг Адрија“.
Тој појаснува дека „идните промени во каматната стапка ќе зависат од динамиката на инфлацијата, која значајно забавува, меѓутоа значајно е да се види понатамошно потрајно намалување на инфлациските притисоци (пред сè дома). Особено се важни и поместувањата на девизниот пазар, каде што движењата засега се стабилни, посебно условени од значајно намалените притисоци врз трговскиот дефицит, солидните дознаки и приливите од странски директни инвестиции. Се разбира, блиско се следат промените во политиката на ЕЦБ, со оглед на нашата врзаност за курсот на еврото, каде што гледаме дека има определена стагнација во зголемувањето на каматните стапки.
„Ваквите движења се генерално поволни и отвораат можност да се размислува за идно олабавување на монетарната политика, но сè уште постојат голем број надворешни и домашни ризици што упатуваат на исклучителна внимателност, воздржување од непотребни шпекулации и потреба трипати да се мери, еднаш да се пресече“, вели Треновски.
Треновски потенцира дека во мала отворена увозно зависна и високо увозно/извозно концентрирана економија со предизвици во доменот на домашно производство на храна, енергија, скромна продуктивност и конкурентност останува значајната ранливост на глобалните ценовни движења и геополитичките состојби – што нè потсетува дека „ветерот“ што носи промени за монетарните политики не е стивнат и сè уште може брзо да се промени“
Дополнително, она што не треба да се заборави е фискалната политика, која е поврзана и со изборниот циклус следната година, при што се најавува раст на платите и на пензиите, што исто така во определени аспекти може да влијае на инфлацијата.
„Затоа сметам дека не треба да се брза со олабавување на монетарната политика сè додека не станат појасни идните тенденции“, вели Треновски.
Тој појаснува дека секоја недела НБРМ детално ги следи надворешните и домашните економски движења и макроекономски политики и речиси секој месец врши преоценување на монетарната политика што ја води, имајќи ги предвид сите домашни и меѓународни ризици. Во ова дејствување на централната банка останува клучен фокус да ѝ бидат стабилноста на цените/ниска инфлација и одржување на стабилноста на финансискиот систем, внимавајќи притоа да не се отапи економската активност во државата.