.webp){kind=icon}
Во услови кога има повисока инфлација се потребни инвестиции во реални добра. А за следната година, сепак, се цени дека вложувањето во акции има голем потенцијал, вели во интервју за „Блумберг Адрија“ Коста Костадиновски, овластен инвестициски советник од „Капитал асет менаџмент“.
„Акциите би ги издвоил како опција што е доста добра за вложување и ќе биде приносна за 2024 година“, додава Костадиновски.
Тој посочува дека треба да се земе предвид дека недвижностите, кои спаѓаат во делот на реални добра, направија значаен исчекор во однос на цените во текот на 2023 година.
Генерално, во однос на компаниите во кои би требало да се вложува во вакви времиња, тоа се компании што можат да ја пренесат инфлацијата на крајните потрошувачи, да го вградат порастот на цените на репроматеријалите и на производството на нивните производи и услуги кон крајните потрошувачи. Тоа се компании што би требало да бидат интересни, а нормално и да се ниско задолжени компании.
Дополнително, Костадиновски додава дека обврзниците направија добри приноси годинава, поради тоа што во услови на повисока инфлација обезбедија цени на кои можат да се добијат добри приноси.
„Очекувам 2024 година генерално да биде постабилна“, вели Костадиновски.
Тој додава дека странските берзи се отворија како можност изминативе неколку години за македонските граѓани, односно за да можат да бидат присутни на тие пазари.
„Тоа претставува едно море на можности што го нуди странскиот пазар. Сепак, таму би сугерирал да се внимава во делот на анализите на компаниите и тука би препорачал користење инвестициски советници што имаат искуство во такви вложувања“, заклучува Костадиновски.
