Македонија изобилува со природни убавини и огромни потенцијали за развој на туризмот во која било сезона. Планините се наш адут и за зимски туризам, но сепак ни недостигаат инвестиции за овие дестинации да бидат привлечни и за домашните и за странските туристи, вели во интервју за „Блумберг Адрија“ Дарко Панов, менаџер на туристичката агенција „Оскар травел“.
Тој посочува дека туризмот е оставен на маргините, наместо да се третира како двигател на економијата.
„За жал, стратегијата за развој на нашиот туризам не е на некое високо ниво. Ако гледаме регионално, а и во светот, во најголем дел од земјите еден голем процент од БДП го создава туризмот. Ние како фела го потенцираме тоа многупати во јавноста, но немаме некој добар одговор. Прв проблем е инфраструктурата, односно несоодветните патишта за првично да се дојде до тие ски-центри. Понатаму, во овие зимски центри, на пример, со години не се вложува многу во однос на ски-центри, уредување на патеките итн. Долги години тие се на едно исто ниво, како што биле направени пред многу години. Понатаму, во самите сместувачки капацитети, имаме добри хотели, но во повеќето ги нема оние дополнителни содржини што ги бараат туристите“, вели Панов.
Тој вели дека иако во Македонија цените се нешто пониски од земјите во регионот, сепак голем дел граѓани, особено оние што скијаат, претпочитаат ски-центри како Банско или Копаоник, со оглед на понудата што ќе ја добијат таму.
„Ние имаме извонредни природни географски фактори за развој на туризмот. Имаме прекрасни планини. Иако во однос на цените сме поевтини од дестинации во регионот, за жал содржините што ги нудиме се малку на пониско ниво. Работиме во таа насока да се подобрат условите во сместувачките капацитети и инфраструктурата, но уште се на пониско ниво. Во однос на цените кај нас, за просечно четиричлено семејство може да се најде понуда во пристоен хотел за 600-700 евра. Кога ќе направиме споредба со цените до 1.000 евра во регионот, но земајќи ги предвид и условите во сместувачките капацитети и на ски-центрите, нашите туристи, претежно тие што скијаат, ги избираат најчесто земјите во регионот. Сепак, и кај нас во моментов туристичките капацитети се полни“, потенцира Панов.
Во поглед на најбараните туристички аранжмани во овој период, Панов ги посочува дестинациите во Србија (Копаоник, Златибор, Стара Планина), во Бугарија (Банско, Боровец, Пампорово), додека во нашата држава тоа се Маврово, Попова Шапка, Пелистер, Крушево, Пониква итн.
Кога станува збор за цените, пак, тој вели дека годинава тие се драстично зголемени во однос на минатите години, меѓутоа, и покрај тоа, побарувачката е на стандардно ниво.
„Во регионот, според последните податоци, цените се зголемени од 25 отсто, па нагоре. Ако направиме анализа за тоа пред две-три години, едно четиричлено семејство можеше да оди во просечен хотел со 3-4 ѕвезди во регионот за 600-700 евра, денес односно зимава а истиот хотел четиричлено семејство би требало да плати 900-1.000 евра за истата понуда“, вели менаџерот на „Оскар травел“.