.webp){kind=icon}
Вештачката интелигенција дефинитивно претставува и закана и можност за работните места. Очекувам дека таа ќе замени одредени работни места, особено оние што се повторливи или рутински, вели во интервју за „Блумберг Адрија“ Игор Мишевски, соосновач на „Импакт фондација“. Тој додава дека тоа веќе се случува во определен дел на сектори како што се медиумите и комуникациите.
„Претпоставувам дека вештачката интелигенција ќе создаде нови видови работни места и ќе го зголеми општото ниво на продуктивност. Клучно е да се обезбедат преквалификација и подготовка на работната сила за овие нови можности. Секој индивидуално треба да се приспособи на новата технологија и да си ги зајакне сопствените вештини“, вели Мишевски.
Тој посочува дека треба да се користат сите можности на технолошки проекти во кои домашните компании или институции можат да учествуваат и да искористат дел од тоа знаење во свои цели.
Што ќе значи вештачката интелигенција за стартап-бизнисите?
За стартапите, вештачката интелигенција претставува огромна можност.
„Новата технологија ќе им овозможи на стартапите да развиваат иновативни решенија со поголема брзина и ефикасност. Тоа може да вклучува сè, од автоматизација на процесите до создавање нови производи и услуги што досега беа невозможни“, вели Мишевски.
Тој додава дека вештачката интелигенција ќе ги поттикне стартапите да растат побрзо, да се развиваат и да бидат поуспешни, при што ќе можат да лансираат производи за пократко време.
„Ваквите стартапи со веќе изградени производи и услуги може да бидат профитабилни од рана фаза. На тој начин, тие нема да имаат потреба од големи средства за раст на бизнисот и самостојно ќе си обезбедат поголема вредност на своите компании“, вели Мишевски.
Какво ќе биде влијанието на вештачката интелигенција врз технолошкиот напредок?
Вештачката интелигенција се очекува да биде катализатор за технолошкиот напредок.
„Тоа ќе вклучува значителни подобрувања во областите како здравство, образование, енергетика и транспорт. Без сомнение ќе биде катализатор за технолошкиот напредок, ќе помогне во оптимизацијата на постојните технологии и ќе овозможи развој на сосема нови технологии“, вели Мишевски.
Тој додава дека во моментот се случува таканаречена дефлација на технологијата.
„Таа станува сè поевтина и подостапна, а со тоа ја зголемува ефикасноста на работењето на компаниите. Вештачката интелигенција ќе ги намали трошоците во многу области и тоа може да влијае на цените и на самите компании“, вели Мишевски.
Тој посочува и дека како дел од компанијата за финансиска технологија „Опфолио“ ги следи движењата на светските берзи и смета дека технолошкиот напредок во комбинација со глобалните конфликти годинава ќе влијае на трендовите на берзата, особено на цените на акциите од технолошкиот и енергетскиот сектор.
Дополнително, Мишевски смета дека земјите со ниски приходи ќе имаат предизвик да фатат чекор со земјите што имаат побрз технолошки развој.
„Во земјите со ниски приходи особено е важно да се поттикнат иновацијата и развојот на вештачката интелигенција во домашните компании и стартапи, за да се искористат можностите што ги нуди оваа технологија“, вели Мишевски.
Тој додава дека што се однесува на Македонија, важно е да се следат светските трендови и да се инвестира во поддршка, образование и развој во оваа област. Може да кажеме дека вештачката интелигенција е крајната цел на модернизацијата на домашните компании, кои треба да ја зголемат својата продуктивност.
