Младите претприемачи бараат решавање на проблемот што го имаат со рекламирање на „Гугл“ (Google), кој не го препознава македонскиот јазик, поради што тие се принудени да се рекламираат на латиница наместо на кирилица.
„Во моментов ’Гугл’ не препознава македонски, но и албански јазик. Кога пробуваме да поставиме реклама на рекламната платформа ’Гугл’, рекламите во најголема мера се одбиени со причина дека не е поддржан јазик“, вели Жарко Димитриоски, претседателот на асоцијацијата на млади претприемачи „Тим 40“.
Тој посочува дека проблемот треба итно да се реши и додава дека иако во минатото имало некои обиди, сепак биле неуспешни.
„Албанците отидоа дури чекор порадикално. Тие имаат поднесено тужба против ’Гугл’ во Сан Франциско. Други држави се имаат соочено со слични проблеми, Словенија побара ’Епл’ да го внесе словенечкиот јазик во ’ајфон’. Италија минатата година го забрани ЧетГПТ сè додека ’Опен-еј-ај’ не ги среди политиките за приватност“, вели Димитриоски.
Дополнително, асоцијацијата на млади претприемачи „Тим“ при Стопанската комора на Северна Македонија бара од политичарите предвидливост, концепт и визија во која насока ќе се движи државата во следните десет години.
Младите претприемачи предлагаат девет насоки за да се подобри бизнис-климата. Дел се однесува на даночни олеснувања, дел на помош за стартап-бизнисите со обезбедување канцеларии во државни простории по поволни услови.