.webp){kind=icon}
Светот бележи негативен раст на продажбата на вино во волумен. Понудата на вино е поголема од побарувачката. Ова го покажува и последниот извештај на банката „Силикон валеј“, кој се смета за еден од најреномираните во винската индустрија, и иако пред сè се однесува на пазарот во САД, сепак е референтен за глобалната винска индустрија, вели Наташа Бреслиска, консултантка за индустријата за вино и алкохол.
„Ако земеме дека ако идеалниот сооднос на резервите во однос на побарувачката би бил 1:1, моментално тоа е 1,6:1 или секогаш кога кутија од 12 шишиња вино ќе излезе од складот на винарницата, нејзиното место го дополнуваат 19 нови шишиња“, вели Бреслиска.
Блумберг Адрија ТВ
За жал, овој тренд не ги заобиколува ниту традиционалните вински пазари и региони. Во 1980 година половина од популацијата во Франција редовно пиела вино.
„Овде ќе го дадеме секако и случајот на Франција како втор поголем пазар за вино во светот. Исто така Франција во последните 35 години забележа многу голем пад на консумацијата на вино, па, така, ако во средината на 1980-тите тој бил околу 80 литри по жител, денес, во 2023 година, се измерени околу 43 литри по жител годишно“, вели Бреслиска.
Нема пад кај премиум вината
Taa додава дека сепак ако се гледа по категории на вино, може да се види разлика во однос на побарувачката.
„Опаѓање има во малопродажниот сектор, односно во маркетите, поточно во ценовната категорија што е под 10 долари. За разлика од нив, категоријата на фини вина или вината од ценовната категорија премиум се во малку подобра положба. Секторот во повисока ценовна категорија вредносно бележи пораст и тој пораст е околу 3 проценти“, вели Бреслиска.
Таа додава дека сега се забележува еден друг тренд, кој покажува значителен раст, а тоа се вината во лименки, безалкохолните и вината со низок процент на алкохол.
Препораки на СЗО за нула толеранција на консумација на алкохол
Последните препораки на Светската здравствена организација (СЗО) се нула толеранција за консумација на алкохол, меѓу кои и за виното.
„Досега лесна до умерена консумација беше толерантна. Од јануари 2023 се смета дека тоа не е доволно и алкохолот се става во групата први причинители на рак. Заедно со азбестот и цигарите, и консумацијата на алкохол ја поврзуваат со појавата на седум вида рак“, објаснува Бреслиска.
Дополнително, СЗО препорачува дека таксите за алкохол треба да се зголемат, рекламирањето да се намали односно да стане порестриктивно, а секако се даваат препораки и за поголема рестрикција во продажните места.
Винскиот свет моментално се консолидира околу ова прашање.
„Моментално се вложува во повеќе студии со цел поконкретно да се докажат некои позитивни ефекти на виното и истото тоа да се изземе од препораките на СЗО“, вели Бреслиска.
Бумерите најмногу пијат вино
Бумерите сè уште се движечка сила во потрошувачката на вино, а зад нив е генерација икс (1965-1980). Во однос на виното, од милениумците (1980-2000) и генерацијата зед (2000-) сè помалку потрошувачи го гледаат како омилен пијалак.
Последното истражување на „Галуп“ покажа дека голем дел милениумци и од генерацијата зед апстинираат од алкохол, меѓутоа засега не се мнозинство.
„На сметка на тоа, генерацијата зед предводи во консумацијата на безалкохолни пијалаци и пијалаци со низок процент на алкохол. Исто така, тие сакаат повеќе да истражуваат и се големи љубители на новите категории како безалкохолни вина и пива, тврд селцер, РТД-пијалаци и др.“, вели Бреслиска.
Од вината, пак, многу повеќе сакаат бело и розе, отколку црвени вина.
Потрошувачка на вина во Македонија
Иако потрошувачката по жител во последните неколку години се зголемува, сепак сме навистина далеку од водечките вински земји, а се декларираме како винска земја.
„Како за споредба, ние трошиме околу 10 литри по жител, за разлика на Франција, која троши околу 43, Словенија околу 25 итн. Причини за тоа има многу. Пред сè ниската куповна моќ на луѓето, недоволна развиената гастрономска сцена, високите цени на вината во рестораните/кафеаните, ограничената и еднолична понуда во кафеаните/рестораните, недоволната комуникација на винарниците, која е повеќе традиционална, малиот број специјализирани вински барови, намалувањето на бројот на населението итн. Последниве две години, пак, е уште полошо со инфлацијата“, заклучува Бреслиска.
