Напредокот на вештачката интелигенција (ВИ), како што предизвикува промени во сите во области на деловното работење, така треба да внесе трансформативни промени кај сајбер-безбедноста, анализира во интервју за „Блумберг Адрија“ Даниел Јордановски, директор во одделот на ИТ-ревизија и ИТ-ризици и технологија во ПвЦ (PwC). Тој посочува дека напредните можности на вештачката интелигенција за анализа на огромни количества податоци овозможуваат автоматизирање на откривањето, идентификувањето и предвидувањето на самите сајбер-закани.
„Секако, постои и загриженост за потенцијалот на вештачката интелигенција. Нема само позитивни промени, има и голем број негативни промени, особено избирањето злонамерни софтвери, идентификувањето на слабости во системите, како напади што ќе бидат управувани од вештачката интелигенција. Исто така вештачката интелигенција ги унапредува фишинг-нападите, кои им дозволуваат на сајбер-криминалците да креираат убедливи имејл-пораки. Исто така имаат и способност за имитирање глас, имитирање одредена личност како говори на видеозапис, а тоа прави да е голем предизвик да се идентификуваат овие упади и честопати има можност да ги заобиколат традиционалните безбедносни мерки“, вели Јордановски.
Јордановски посочува дека секторот за сајбер-безбедност продолжува да се справува со многу значителен предизвик, а тоа е недостигот од стручен кадар.
Големите банки имаат солидна заштита од сајбер-напади
Од друга страна, финансискиот сектор отсекогаш е атрактивен за различни хакерски напади и со сè поголемиот степен на дигитализација на финансиските услуги, хакерите ги зголемуваат своите напори кон банките и другите финансиски институции.
„Повеќе од 17 години сум вклучен во ИТ-ревизии кај банките кај нас, во Македонија, исто така и низ Европа, и можам да кажам дека кај нас големите банки имаат солидна заштита од сајбер-напади и, секако, во нивен интерес е да ги заштитат финансиските средства на клиентите“, вели Јордановски.
Тој посочува дека тука голема улога игра и супервизијата од НБРМ, од каде што редовно ги ажурираат регулативата и барањата кон банките за имплементирање сајбер-заштити.
„Сајбер-нападите континуирано еволуираат, така што и банките мора да се унапредуваат континуирано и да си прават одредени проверки, ИТ-ревизии и проверки на самата сајбер-заштита“, вели Јордановски.
Тој посочува дека минатата година во глобални рамки сајбер-нападите направиле штета од осум трилиони долари и се очекува тоа да расте за 15 отсто секоја година. Секако, и Македонија не е изолирана и само мал дел од сајбер-нападите се објавуваат јавно, има случаи за кои јавноста не е информирана, а предизвикуваат огромна штета.