.webp){kind=icon}
Исклучително е важно да се издигне нивото на свесност кај компаниите и државните и јавните институции за потребата од поголема сајбер-безбедност, вели во интервју за „Блумберг Адрија“ Стевчо Ристески, директор за продажба на деловни корисници во „А1 Македонија“.
„Имено, со појавата на пандемијата настана на еден начин присилна дигитализација и голем број компании мораа да излезат во сајбер-просторот, односно во дигиталниот простор, со цел да овозможат непречено функционирање на бизнисот. Во такви услови нагло се зголеми бројот на потенцијални цели за безбедносни сајбер-закани“, појаснува Ристески.
Тој додава дека, додека стандардниот криминал во тој период стагнираше или опаѓаше, сајбер-криминалот почна да расте.
„Во такви услови, во Македонија се појави огромна дискрепанција помеѓу бројот на потенцијални цели што се појавија за безбедносни сајбер-напади и подготвеноста на компаниите со своите ресурси да одговорат соодветно и да се заштитат од овие безбедносни сајбер-напади. Како резултат на тоа, би рекол дека имавме поголем број такви безбедносни инциденти“, вели Ристески.
Тој објаснува дека некои од тие сајбер-напади се јавни, некои од нив останаа деловна тајна на компаниите, но се направи сериозна штета. Во таа насока, Ристески смета дека трендовите што треба да ги следат компаниите подразбираат следење на некои најдобри практики во делот на ИТ-безбедноста, а пред сè исклучително недостига обука на вработените, односно едукација на вработените за ризиците во сајбер-безбедноста.
