Странските компании во Македонија го преферираат оперативниот лизинг, бидејќи сакаат предвидливост во буџетирањето. „Овој начин е практикуван и во нивните локални компании, а искуството го пренесуваат и кај нас“, вели Марјан Манчев, извршен директор на „Шпаркасе лизинг“, во интервју за „Блумберг Адрија“.
„Она што е интересно, особено кај странските инвеститори, генерално кај компаниите што се со странски капитал е тоа дека не го бараат оној класичен финансиски лизинг, туку го бараат оперативниот лизинг со целосно одржување. Странските компании сакаат предвидливост во нивното буџетирање и во нивните трошоци, а тој дел со целосно одржување им го дава токму тоа, без разлика дали се тоа возила или друг тип опрема“, вели Манчев.
Манчев посочува дека лизинг-индустријата во последните пет-шест години се развива со задоволително темпо, со просек од 20 отсто годишно, при што во 2023 година се пласирани над 110 милиони евра на македонскиот пазар, со приближно 3.500 лизинг-договори.
„Ако се земе во корелација со развојот на продажбата на нови автомобили, Македонија за овие пет години расте со просечно темпо од десетина проценти“, додава Манчев.
Тој додава дека се гледа оти лизинг-индустријата во последниве години направи сериозно поместување во делот на финансирањето и во бројот на нови клиенти и стана попозната, попопуларна и подостапна за клиентите.
„И во 2024 година трендот во првите месеци е позитивен, така што очекуваме тој позитивен тренд на развој на лизинг-индустријата да продолжи, притоа и самите портфолија на лизинг-компаниите, па и на нашата, да се зголемат. Како податок за тоа е дека, заклучно со 31.12.2023 година, лизинг-компаниите имаат за портфолио од 200 до 220 милиони евра“, вели Манчев.
Во однос на структурата, учеството на финансирање патнички автомобили во вкупниот финансиран износ од страна на лизинг-компаниите е од 50 до 65 отсто.
Главни предизвици за лизинг-индустријата остануваат потезите на централните банки.
„Високите каматни стапки ќе имаат особено влијание кај оние компании што го базирале бизнисот на високи обрти со помали маржи, каде што влијанието на каматната стапка е поголемо врз нивното работење“, вели Манчев.
Дополнително, тој додава дека изборните процеси, но и политичките тензии во светот, секако имаат влијание и врз овој сектор.