.webp){kind=icon}
Во Македонија и натаму најмногу се вози на дизел, а македонските граѓани најчесто поседуваат возила „фолксваген“, покажува официјалната статистика на МВР за 2022 година. Бројот на регистрирани електрични автомобили, иако од година на година постојано се зголемува, сепак е незначителен во вкупната бројка на регистрирани автомобили, односно е околу 0,1 отсто. „Причини има повеќе“, вели Виктор Мизо, генерален директор на „Костал Македонија“.
Блумберг Адрија ТВ
„Би рекол, стандардот сигурно е една причина, но истовремено тука е и инфраструктурата, односно недостигот од полначи каде што овие возила може да се наполнат, особено надвор од главниот град“, вели Мизо.
Истовремено, Мизо смета дека друга причина, секако, е и тоа што цените на електричните возила се многу повисоки споредено со возилата на внатрешно согорување.
Блумберг Адрија ТВ
„Многу луѓе размислуваат дали да ги купат овие европски возила, кои се драстично поскапи, или кинеските возила, кои сè повеќе и повеќе продираат на европскиот пазар. Но луѓето сè уште имаат една доза на скептицизам, дали тие возила се доволно квалитетни, дали ќе најдат соодветни резервни делови за нив. Но сè повеќе и повеќе сметам дека ќе се случи тоа и кинеските возила поради вредноста и цената ќе станат поконкурентни не само во Европа туку и во Македонија“, вели Мизо.
Во Европа потребата, желбата и интересот за купување на електрични возила се намалени од првичната процена пред околу две, па дури и една година.
Блумберг Адрија ТВ
„Ако ги гледаме бројките за минатата година, вкупно беа продадени околу два милиона електрични возила во земјите на Европска Унија, а тоа е околу 14,6 отсто од вкупниот европски пазар. Додека, кај плагин хибридните возила, кои сепак мора да ги земеме во една заедничка група со електричните возила, продажбата беше една половина од тоа, односно околу 990 илјади“, вели Мизо.
Според статистиката, околу 28 отсто повеќе електрични возила се продадоа лани во споредба со 2022 година.
„Ако го земеме јануари годинава, гледаме дека има зголемување и на електричните и на плагин хибридните возила од околу 23 отсто на годишно ниво споредено со минатиот јануари. Но, во овој случај уделот на целосно електрични возила е само 10,9 проценти во продажбите во јануари, додека плагин хибридните возила имаат удел од 7,8 проценти“, вели Мизо.
Тој додава дека има зголемен тренд, но не е толку брз колку што се очекуваше, а тука сепак влијаат и цената и субвенциите.
„Истовремено имаме некои од производителите што веќе носат одлуки за пролонгирање на рокот до кога ќе бидат трансферирани во целост со електрични автомобили. Таков беше случајот со ’Мерцедес’ на почетокот на минатата недела, кои кажаа дека наместо 2030 година, го пролонгираат рокот до кога тие ќе бидат целосно електрифицирани. Тие велат дека до 2030 година само 50 отсто од нивните возила ќе бидат електрични, но не сто отсто како што беше претходно најавено“, вели Мизо.
Блумберг Адрија ТВ
Кина ја презема доминацијата
БЈД официјално го престигна „Фолксваген“ како најпродавана марка на автомобили во Кина за 2023 година, што е јасен показател дека нејзиниот фокус е на електричните возила. Но, истовремено, БЈД и минатата година ја пристигна „Тесла“ на глобално ниво како најголем производител на електрични возила, иако во нивната палета на возила влегуваат и електрични плагин хибридни возила. Она што е многу интересно е дека тие не се концентрираат само на кинескиот пазар.
Претседателот на БЈД во понеделникот беше во Унгарија, новата дестинација за производство во европскиот пазар, а истовремено тие веќе планираат да произведуваат и на мексиканскиот пазар за продажба во САД.
„Гледате колку се агресивни и колку размислуваат како да ги надминат и потенцијалните трговски бариери. Односно, како тие евентуално со производство во Унгарија и во Мексико би ги превенирале евентуалните трговски бариери. А знаеме дека тие трговски бариери се најавени, односно дека Европската Унија може да ѝ ги наметне на Кина заради потенцијалните субвенции. И дополнително, без разлика што ќе се случи на претседателските избори во Америка, и таму имаме потенцијални трговски војни помеѓу Америка и Кина. Но, сепак, Кина веќе размислува како да се справи со таквите ситуации“, вели Мизо.
