.webp){kind=icon}
Климатскиот инвестициски фонд ѝ додели на Македонија 85 милиони американски долари преку Програмата за забрзана транзиција од јаглен, наменети исклучиво за погодените региони - Пелагонискиот и Југозападниот.
„Комбинирајќи концесиски заеми, тоа се поволни заеми, но нормално тука ќе има грант во износ од 10 отсто од оваа сума. Како надополнување на овој фонд се и мултилатералните развојни банки што се подготвени да ги надополнат овие средства и, секако, да ни обезбедат поволни заеми“, вели Размена Чекиќ Дуровиќ, државна секретарка во Министерството за економија.
Размена Чекиќ Дуровиќ
Блумберг Адрија
Таа дополнува дека се прават анализи, издвоени се дел од средствата од Климатскиот инвестициски фонд за пренамена на земјиште, за замена на јагленот како базно гориво, но секако ќе се внимава да не се загрози безбедноста со снабдувањето со електрична енергија.
Политики и мерки за енергетска ефикасност
Чекиќ Дуровиќ посочува дека се свесни оти само со ефективни политики и мерки за енергетска ефикасност, Македонија може да ги зголеми заштедите во потрошувачката на примарна и финална енергија.
„Во согласност со Стратегијата за развој на енергијата до 2040 година, која беше донесена од страна на Владата на Република Северна Македонија, инвестициите мора значително да се зголемат за да се овозможи енергетска транзиција. Во стратегијата може јасно да се види дека капиталните инвестиции во енергетската ефикасност, проследени со инвестициите во производство на ОИЕ, се главниот фокус на сите три предложени сценарија“, вели Чекиќ Дуровиќ.
Блумберг Адрија
Таа додава дека Фондот за енергетска ефикасност треба да биде инструмент што ќе овозможи зголемено финансирање проекти и програми за енергетска ефикасност за исполнување на националните цели во енергетската ефикасност (ЕЕ).
„Фондот за ЕЕ ќе се формира во рамките на Банката за развој на Северна Македонија. Имено, направени се измени и дополнувања на Законот за развојната банка за Северна Македонија, со кои се предвидува формирање фондот за енергетска ефикасност во рамките на банката како посебна организациска единица. Со измените се овозможува финансирање преку кредити, гаранции и грантови на проекти кај јавните субјекти за подобрување на енергетската ефикасност, додека за резиденцијалниот сектор и компаниите ќе бидат обезбедени средства за спроведување мерки за енергетска ефикасност во форма на поволни кредити преку комерцијалните банки“, вели Чекиќ Дуровиќ.
Фонд за енергетска ефикасност
Со измените на законот се предвидува средствата во фондот за ЕЕ да бидат обезбедени од буџетот на Република Македонија, како неповратни средства; заеми и/или кредитни линии од меѓународни финансиски институции; донации од земјата и странство; приходи од камати и провизии за одобрените кредити и издадени гаранции; приходи од пласмани во хартии од вредност; приходи од спроведување на облигационата шема за енергетска ефикасност и други извори на финансирање утврдени со посебен закон.
„Сепак, во почетокот на работењето на фондот во првиот циклус на финансирање е предвидено да бидат финансирани проекти за подобрување на енергетската ефикасност и заштеди на енергија во јавниот сектор“, вели Чекиќ Дуровиќ.
